एसटीचे तिकीट बुकिंग ‘कॅशलेस’

म.टा.प्रतिनिधी,नगर

एसटी महामंडळाकडून प्रवाशांना सेवा देण्यासाठी अत्याधुनिक तंत्रज्ञानाचा वापर केला जात आहे. एसटीचे तिकीट बुकिंग कॅशलेस करता येणार आहे. नगर शहरातील तारकपूर, माळीवाडा व स्वस्तिक या तीन बसस्थानकांसह जिल्ह्यातील १९ बसस्थानकांवर यासाठी स्वाइप मशीन उपलब्ध करुन दिल्या जाणार आहेत. विभागीय कार्यालयाने याबाबतचा प्रस्ताव महामंडळास सादर केला आहे.

एसटी महामंडळाकडून प्रवाशांना दर्जेदार सेवा देण्यासाठी प्रयत्न होत आहे. बसस्थानकांचे सुशोभिकरण, बसस्थानकांवर सोलर, पाससाठी स्मार्ट कार्ड, प्रवाशांच्या सुरक्षेसाठी बसस्थानकांवर सीसीटीव्ही कॅमेरे यांसारख्या योजना राबवल्या जात आहेत. यामध्ये आता आणखी एका सुविधेची भर पडली आहे. जिल्ह्यातील वर्दळीच्या २३ बसस्थानकांवर कॅशलेस तिकीट बुकिंगची सुविधा उपलब्ध केली जाणार आहे. या बसस्थानकांवर लवकरच स्वाईप मशीन दिले जाणार आहेत. त्यामुळे प्रवाशांना डेबिट कार्ड, क्रेडिट कार्डच्या माध्यमातून तिकीट बुकिंग करता येणार आहे. या बसस्थानकांचा प्रस्ताव तयार करुन महामंडळाच्या मुंबईतील मुख्य कार्यालयास सादर करण्यात आला आहे. प्रस्तावास मंजुरी मिळाल्यानंतर तत्काळ कार्यवाही सुरू केली जाणार असल्याचे सांगण्यात आले. या प्रस्तावास महामंडळाच्या वरिष्ठ अधिकाऱ्यांनी अनुकूलता दर्शवली आहे. तरीदेखील प्रस्तावास मंजुरी मिळाल्यानंतरत प्रत्यक्ष कामकाजास सुरुवात होण्याची शक्यता आहे. शहरातील तीन बसस्थानकांसह अकोले तालुक्यातील राजूर, नेवासा, श्रीरामपूर, संगमनेर, कोपरगाव, शेवगाव, जामखेड, राहुरी, श्रीगोंदा आदी १९ बसस्थानकांत स्वाइप मशीन दिली जाणार आहेत.

शिर्डी व शिंगणापूरला ऑनलाइन बुकिंग सुरू

जिल्ह्यातील शिर्डी व शनी शिंगणापूर येथे रोज हजारो भाविक दर्शनासाठी येत असतात. त्यामुळे येथे ऑनलाइन तिकीट बुकिंग सुरू करण्यासाठी एसटीच्या अधिकाऱ्यांकडून प्रयत्न केले जात होते. त्यास अखेर यश आले आहे. शिंगणापूर व शिर्डी देवस्थानांनी एसटीस जागा उपलब्ध करुन दिली आहे. त्यामुळे येथे ऑनलाइन तिकीट बुकिंगला सुरुवात झाली आहे. या सुविधेस प्रवाशांचा चांगला प्रतिसाद मिळत असल्याचे अधिकाऱ्यांचे म्हणणे आहे.

कोट

जिल्ह्यातील २३ बसस्थानकांवर स्वाइप मशीन दिली जाणार आहेत. यासाठी कार्यालयाने प्रस्ताव तयार करुन महामंडळास सादर केला आहे. प्रस्तावास मंजुरी मिळाल्यानंतर कार्यवाही केली जाणार आहे. याबाबत पूर्वतयारी झाली आहे.

– अशोक जाधव, विभाग नियंत्रक