शिक्षक पगाराच्या प्रतीक्षेत

म. टा. प्रतिनिधी, नगर

मनपा शिक्षण मंडळांतर्गत काम करणाऱ्या ४५ शिक्षकांना दोन महिन्यांपासून पगारच मिळालेला नाही. आता तिसरा, जानेवारी महिनाही संपत आल्याने त्यांची पगाराची थकित रक्कम सुमारे ४५ लाख रुपये होणार आहे.

मनपा शिक्षण मंडळाच्या १२ शाळांतून ४५ शिक्षक आहेत. यात ३३ महिला आहेत. या सर्वांचे ऑक्टोबरअखेरपर्यंतचे पगार झाले आहेत. त्यानंतरचे पगार अद्याप झालेले नाहीत. आयुक्तांसह उपायुक्त व लेखाधिकाऱ्यांची दालने झिजवत आहेत. पण त्यांना आश्वासनांपलीकडे काहीही मिळत नाही. एलबीटी अनुदान आले की तुमचे पैसे तातडीने देऊ, असे सांगितले जात असले तरी प्रत्यक्षात हे अनुदान आल्यानंतर शिक्षकांच्या देण्याचा विसर पडत असल्याने या मंडळींचा पाठपुरावा नियमित सुरू आहे.

घोंगडे अडकलेले

मनपा शिक्षण मंडळातील ४५ शिक्षक व सहा शिक्षकेतर कर्मचाऱ्यांच्या पगारासाठी व निवृत्तांच्या निवृत्तीवेतनासाठी सरकार निम्मे अनुदान देते व निम्मे पैसे मनपा देते. सरकारचे निम्मे अनुदान वेळच्या वेळी येते. यातून निवृत्तीवेतन व शिक्षकेतर कर्मचाऱ्यांचे नियमित वेतन, प्रवास भत्ता बिले निघतात. मनपाच्या अनुदानातून शिक्षकांचे पगार होतात. पण मागील दोन महिन्यांपासून मनपाने त्यांच्या हिश्श्याचे पैसेच दिलेले नाहीत. मनपा शिक्षण मंडळाचे १२९ निवृत्त शिक्षक व कर्मचारी आहेत. त्यांच्या निवृत्तीवेतनासाठी दरमहा सुमारे २१ ते २२ लाख रुपये आवश्यक असतात. शिक्षकांच्या पगारासाठी १५ लाखांवर रक्कम हवी असते. शिक्षकेतर कर्मचाऱ्यांच्या वेतनाची रक्कम लाख ते दीड लाखाची असते. शिक्षण मंडळाच्या प्रशासन अधिकाऱ्यांचे वेतन पुण्याच्या शिक्षण उपसंचालकांकडून येते. त्यामुळे त्यांचा प्रश्न नसतो.