म. टा. प्रतिनिधी, नगर
जिल्हा परिषदेच्या माध्यमातून केल्या जाणाऱ्या विविध योजनांच्या टेंडरच्या कारभाराची तपासणी करण्याचा निर्णय घेण्यात आला आहे. त्यानुसार विभागांच्या टेंडरच्या प्रक्रियेची तपासणी करण्यास जिल्हा परिषदेने सुरुवात केली आहे. बांधकाम विभाग, लघुपाटबंधारे विभागांच्या टेंडर प्रक्रियेची तपासणी होणार आहे. टेंडरच्या कारभारात गडबडीची शंका वाटत असल्याने जिल्हा परिषदेच्या वरिष्ठ अधिकाऱ्यांनी हा निर्णय घेतला आहे.
सरकारी कामकाजासाठी ऑनलाइन टेंडर पद्धतीचा अवलंब केला जात आहे. विविध योजनांसाठी अगोदर राज्य सरकारच्या वेबसाइटवर ऑनलाइन टेंडर प्रसिद्ध करावे लागते. त्यानंतर ठेकेदारांनी टेंडर भरल्यानंतर पुढील कार्यवाही केली जाते. जिल्हा परिषदेसह अन्य सरकारी विभागांकडून या पद्धतीने कार्यवाही केली जात आहे. टेंडर प्रक्रिया ऑनलाइन करण्यात आली असली तरी यामध्येही गडबड होण्याची भीती निर्माण झाली आहे. त्यामुळे टेंडर प्रक्रियेची तपासणी करण्याचा निर्णय घेतला आहे. टेंडरमध्ये खरेच गडबड होत आहे का, फाइलमध्ये फेरफार होत आहे का, कमी किमतीच्या निविदांबाबत काय कार्यवाही केली जात आहे, याबाबत तपासणी केली जाणार आहे. जिल्हा परिषदेच्या बांधकाम, पाणीपुरवठा आणि लघुपाटबंधारे विभागातील टेंडरच्या फाइल तपासल्या जाणार आहेत. यानंतर अन्य विभागांचेही टेंडर तपासणी होण्याची शक्यता आहे. ऑनलाइन नोंदीही तपासल्या जाणार असल्याची माहिती जिल्हा परिषदेतून देण्यात आली.