​ ७० अॅम्ब्यूलन्स चालकांसाठी टेंडर

म. टा. प्रतिनिधी, नगर
जिल्ह्यातील प्राथमिक आरोग्य केंद्रांतील अॅम्ब्यूलन्स सेवा चालकांअभावी ठप्प झाली आहे. चालक नसल्याने अॅम्ब्यूलन्स उभ्या असून रुग्णांचे हाल होत आहेत. चालकांसाठी आरोग्य विभागाने टेंडर प्रसिद्ध केले असून या टेंडरची प्रक्रिया अंतिम टप्प्यात आहे. निवीदा उघडून ठेकेदारांना पुरवठा आदेश दिल्यानंतर त्यांच्याकडून चालक दिले जाणार आहेत.

आरोग्य केंद्रातील रुग्णांसाठी अॅम्ब्यूलन्स दिल्या असल्या तरी या अॅम्ब्यूलन्सला चालक नाहीत. नव्या चालकांची भरती आरोग्य विभागाने केली नसल्याने बऱ्याच दिवसांपासून ही सेवा बंद आहे. त्यामुळे रुग्णांची वाहतूक करताना अडचणी येत आहेत. चालकांच्या भरतीसाठी आरोग्य विभागाने टेंडर प्रसिद्ध केले आहे. या टेंडरला प्रतिसाद मिळाला आहे. ठेकेदारांनी भरलेल्या निवीदा उघडून निवीदा मंजूर केल्या जाऊन पुरवठा आदेश दिले जाणार आहे. ही प्रक्रिया अंतिम टप्प्यात आहे. त्यामुळे अॅम्ब्यूलन्सच्या चालकांची समस्या आता निकाली निघण्याची शक्यता आहे. दरम्यान, मागील आठवड्यात झालेल्या जिल्हा परिषदेच्या सर्वसाधारण सभेत या विषयावर जोरदार चर्चा झाली होती. सदस्यांनी आरोग्य विभागाच्या कारभारावर नाराजी व्यक्त करत चालकांची भरती करण्याची मागणी केली. त्यावर प्रशासनाने सदस्यांना टेंडरची प्रक्रिया अंतिम टप्प्यात असल्याचे सांगितले. त्यानंतर सदस्यांनी मात्र गोंदिया जिल्हा परिषदेने त्यांच्या अधिकारात चालकांची भरती केली त्याच पद्धतीने नगर जिल्हा परिषदेने भरती करण्याची मागणी केली. अशा पद्धतीने चालकांची भरती करण्याची परवानगी नगर जिल्ह्यासाठी नाही हे माहित असल्याने प्रशासनाने सदस्यांच्या या मागणीकडे प्रशासनाने दु्र्लक्ष केले असून टेंडर काढूनच भरती होणार असल्याचे सांगण्यात आले.