म. टा. वृत्तसेवा, राहुरी
डॉ. बा. बा. तनपुरे सहकारी साखर कारखान्याच्या निवृत्त कर्मचाऱ्यांचे थकीत १८ लाख रूपये जमा केल्याने कार्यकारी संचालक ठकाजी ढोणे यांच्यावरील अटकेची कारवाई टळली.
थकीत देणी मिळाली नसल्याने १३ निवृत्त कामगारांनी कामगार न्यायालयात धाव घेतली होती. कारखान्याचे कार्यकारी संचालकांना या प्रकरणी अटक करण्याचे आदेश जिल्हाधिकारी कार्यालयाकडून देण्यात आले होते. शनिवारी (१५ सप्टेंबर) अटक करण्यात येणार होती परंतु विभागीय आयुक्तांनी स्थगिती दिली तसेच कारखाना व्यवस्थापनाने तातडीने १८ लाख रुपये जमा केल्याने ढोणे यांच्यावरील कारवाई तुर्त टळली.
जिल्हाधिकाऱ्यांना कामगारांची देणी वसूल करण्याचा आदेश देण्यात आला होता. यासाठी त्यांनी वेळोवेळी पत्रव्यवहार करून सुचना दिल्या होत्या. परंतु कारखाना व्यवस्थापनाकडून अपेक्षित प्रतिसाद मिळत नसल्याने जमीन महसूल कलमान्वये कार्यकारी संचालक ठकाजी ढोणे यांना ताब्यात घेऊन दहा दिवसांसाठी अटक करण्याचे आदेश तहसीलदारांनी राहुरी पोलिसांना दिले होते. मात्र, कारवाईच्या भितीने कारखाना व्यवस्थापनाने २५ टक्के रक्कम भरून सुटका करून घेतली. उर्वरित रक्कम कधी भरली जाते यावर पूढील कारवाई अवलंबून आहे. कारखान्याच्या १३ निवृत्त कर्मचाऱ्यांनी न्यायालयात धाव घेऊन कैफियत मांडली होती. या घटनेमुळे कामगारांमध्ये खळबळ उडाली होती. मात्र, आता उर्वरित निवृत्त कामगारही याच मार्गाने जाण्याच्या तयारीत आहेत. कारखान्याच्या सर्वच विभागातील कामगारांची कोट्यवधी रुपयांची रक्कम थकीत असून कामगार न्यायालयाच्या निर्णयाने काही कामगारांना दिलासा मिळाला आहे. त्यामुळे उर्वरीत रक्कम वसूल होण्याचा मार्ग मोकळा झाला आहे.