जिल्ह्यातील ग्रामपंचायतींना फायदा

म. टा. प्रतिनिधी, नगर
चलनातून रद्द झालेल्या नोटा थकीत कर जमा करण्यास परवानगी देण्यात आल्यानंतर नागरिकांकडून कर भरणा केला जात आहे. जिल्ह्यातील ग्रामपंचायतीत नागरिकांनी तब्बल ५ कोटी ३ लाख रुपये करभरणा केला आहे. या निर्णयामुळे ग्रामपंचायतींना फायदाच झाला आहे. नागरिकांनी कर भरण्यासाठी स्वतःहून पुढाकार घेतल्याने महिनाभरात पाच कोटी रुपये जमा झाले आहेत.
कराची वसुली होत नसल्याने ग्रामपंचायती नेहमीच चिंतेत असतात. ग्रामपंचायतींची घरपट्टी, पाणीपट्टी नागरिकांकडून वेळेवर भरली जात नसल्याने उत्पन्नावर परिणाम होतो. पाचशे आणि हजारांच्या नोटा रद्द करण्याचा निर्णय झाल्यानंतर शासकीय संस्थांना जुन्या नोटांद्वारे त्यांची थकबाकी वसूल करण्यास परवानगी देण्यात आली. नागरिकांनीही स्वतःकडील जुन्या नोटांचा सदुपयोग करत आपल्या नावावरील थकबाकी भरुन खाते थकबाकीमुक्त करण्यास प्राधान्य दिले. ग्रामपंचायतींनी थकबाकी भरण्याचे आवाहन केल्यानंतर नागरिकांनी यास प्रतिसाद दिला आहे. महिनाभरात ग्रामपंचायतींच्या खात्यात ५ कोटी ३ लाख ७२ हजार ७९ रुपये जमा झाल्याची माहिती ग्रामपंचायत विभागाचे उपमुख्य कार्यकारी अधिकारी प्रशांत शिर्के यांनी दिली.