म. टा. प्रतिनिधी, नगर
नगर-पुणे रोडवर माणीकनगर भागात असलेल्या लक्ष्मण खाशेराव रणसिंग याच्या घरामध्ये छापा टाकून स्थानिक गुन्हे शाखेने 'आयपीएल' मॅचवर सट्टा खेळणाऱ्या महेश जगन्नाथ बल (वय २०, रा. केडगाव) व परमेश्वर रामदास पवार (वय २९, रा. नालेगाव) या दोघांना अटक केली. या आरोपींकडून पोलिसांनी १ लाख ६४ हजारांचा मुद्देमाल जप्त केला आहे. रविवारी (१५ एप्रिल) रात्री उशिरा स्थानिक गुन्हे शाखेने ही कारवाई केली.
महेश बल व परमेश्वर पवार हे दोघे रविवारी सुरू असलेल्या 'आयपीएल' क्रिकेट मॅचवर मोबाइल फोन व लॅपटॉपच्या सहाय्याने स्वतःच्या व लक्ष्मण खाशेराव रणसिंग याच्या फायद्यासाठी क्रिकेट बेटिंग नावाचा जुगार चालवत असल्याची माहिती पोलिसांना मिळाली होती. त्यानुसार स्थानिक गुन्हे शाखेचे पोलिस निरीक्षक दिलीप पवार यांनी आपल्या पथकासह लक्ष्मण रणसिंग याच्या माणिकनगर परिसरात असणाऱ्या घरावर छापा टाकला. या ठिकाणी महेश बल, परमेश्वर पवार हे रविवारी रात्री सुरू असलेल्या 'आयपीएल' क्रिकेट सामन्यामध्ये कोण जिंकणार, कोण हरणार यासोबतच खेळाडूचे रन्स व विकेट यावर सट्टा लावून बेटिंग जुगार चालवत असल्याचे आढळले. त्यानंतर या दोघांना पोलिसांनी ताब्यात घेतले. या दोघांकडून पोलिसांनी एक लॅपटॉप, वेगवेगळ्या कंपन्यांचे नऊ मोबाइल, एक पोर्टेबल १४ इंच टीव्ही, इंग्रजी अक्षरामध्ये आकडेमोड केलेली रजिस्टरची पाने तसेच रोख १ लाख २४ हजार ५०० रुपये असा एकूण १ लाख ६४ हजार ६०० रुपयांचा मुद्देमाल जप्त केला. यासंदर्भात कोतवाली पोलिस स्टेशनमध्ये गुन्हा नोंदवण्यात आला आहे. दरम्यान, लक्ष्मण खाशेराव रणसिंग हा पळून गेला आहे.