लहान मुलांसह महिलांचा उत्साही सहभाग
म. टा. प्रतिनिधी, नगर
मॉडेलिंग, फॅशन, व्यक्तिमत्त्व व सौंदर्यावर आधारित 'बेस्ट फेस' स्पर्धा येथे उत्साहात झाली. लहान मुला-मुलींसह युवती व महिलांचा यात सहभाग होता. पुणे, मुंबईच्या मॉलमध्ये होणाऱ्या स्पर्धेच्या धर्तीवर प्रथमच अशी स्पर्धा नगरमध्ये झाली. यात नगरसह मुंबई, बीड तसेच अमेरिकेतील स्पर्धकांनी भाग घेतला.
येथील प्रतिबिंब संस्थेच्या वतीने दीक्षित कार्यालयात झालेल्या या स्पर्धेस स्पर्धक व प्रेक्षकांचा उत्साही प्रतिसाद मिळाला. 'मिसेस बेस्ट फेस ऑफ अहमदनगर' स्पर्धेत रोहिणी थोरात विजेत्या व जयश्री पोटे उपविजेत्या ठरल्या. या गटात उत्तेजनार्थ बक्षीस धनश्री दारुणकर यांना मिळाले. 'मिस बेस्ट फेस ऑफ अहमदनगर' गटाच्या विजेत्या सपना खारगे तर उपविजेत्या पायल नवसूपे आणि उत्तेजनार्थ बक्षीस विजेत्या तेजल परमार ठरल्या. लहान मुलांसाठीच्या दोन गटांच्या स्पर्धेपैकी 'लिटिल बेस्ट फेस ऑफ अहमदनगर' गटाची विजेती डॉल्फी व उपविजेती तनिष्का पिंगट झाली. तर 'मास्टर बेस्ट फेस ऑफ अहमदनगर' किताबाचा विजेता उत्कर्ष गावडे व उपविजेता मेहेर गुरुमेल (अमेरिका) हे ठरले. या सर्वांना ट्रॉफी व टायटल देण्यात आले. याशिवाय बेस्ट स्माइल, बेस्ट ड्रेसिंग, बेस्ट अॅटिट्युड, बेस्ट टॅलेंट आदी पारितोषिकेही देण्यात आली.
दीक्षित फिटनेस क्लबच्या संचालक अवंतिका दीक्षित, स्पार्कल इन्स्टिट्यूटच्या संचालक अनुजा कांबळे, प्रसिद्ध ब्युटिशियन भावना केदार, गायत्री झंवर, परीक्षक कोकण सुंदरी योगिता गुरव व सागर मांजुरे यांच्या हस्ते पारितोषिके देण्यात आली. महेश कांबळे यांनी प्रास्ताविक केले. 'या स्पर्धेतून ब्युटी विथ टॅलेंट स्पर्धकांना समजले तसेच नुसते सुंदर असून उपयोग नाही तर ज्ञान पण पाहिजे आणि सध्याच्या युगात सोशल मीडिया वापरून त्यातून बौद्धिक ज्ञान घेतले पाहिजे,' असे या वेळी दीक्षित म्हणाल्या. नगरच्या सांस्कृतिक विकासासाठी अशा स्पर्धांची गरजही त्यांनी मांडली.
--