धर्मा पाटील मृत्यूला केंद्र सरकारही जबाबदार- हजारे

म. टा. प्रतिनिधी, नगर

'जमिनीचा योग्य मोबदला मिळावा या मागणीसाठी मंत्रालयात विष घेऊन आत्महत्या केलेल्या धर्मा पाटील यांच्या मृत्यूस केंद्र सरकारही जबाबदार आहे,' असा आरोप ज्येष्ठ समाजसेवक अण्णा हजारे यांनी केला आहे. 'मृत्यू झाल्यावर भरपाई देण्यापेक्षा केंद्र सरकारने देशभरातील जमिनींचे सर्वेक्षण करून भाव ठरवावेत आणि भूसंपादनाच्या वेळी त्यानुसार मोबदला दिला जावा,' अशी मागणीही हजारे यांनी केली आहे.

धर्मा पाटील यांच्या आत्महत्येसंबंधी प्रसारमाध्यमांशी बोलताना हजारे म्हणाले, 'पाटील यांना योग्यवेळी योग्य मोबदला मिळाला असता, तर त्यांचा जीव वाचला असता. आता त्यांना वाढीव मोबदला देऊन काय उपयोग आहे, त्याने त्यांचा जीव थोडाच परत येणार आहे? अशा घटनांना केंद्र सरकारलाही जबाबदार धरले पाहिजे. भूसंपादन करताना शेतकऱ्यांना योग्य मोबदला मिळावा यासाठी काही उपाय यापूर्वीच केंद्र सरकारला सूचविले होते. मात्र, सरकार त्याकडे दुर्लक्ष करीत आहे. आधुनिक तंत्रज्ञानाच्या आधारे देशभरातील जमिनीचे सर्वेक्षण करणे शक्य आहे. ते करून केंद्र सरकारने नोंदी ठेवाव्यात आणि काही निकष ठरवून जमिनीचे भाव निश्चित करून द्यावेत. त्या आधारे शेतकऱ्यांना मोबदला दिला जावा. केवळ शेतजमीन नव्हे, तर त्यातील पिके आणि फळबागांचाही मोबदला मिळाला पाहिजे, ही शेतकऱ्यांची मागणी रास्त आहे. मृत्यूनंतर जागे होऊन उपयोग नाही. सरकार चालविणाऱ्या लोकांनी हे ध्यानात घेतले पाहिजे. मंत्रालयात काम करणारे बहुतांश अधिकारी-कर्मचारी शेतकऱ्यांचीच मुले आहेत. त्यांनी अशी प्रकरणे संवेदनशीलपणे हातळली पाहिजेत. दिल्लीत होणाऱ्या नियोजित आंदोलनात आपण हे मुद्देही पुन्हा उपस्थित करणार आहोत.'