पिंपळदरीच्या गडावर लाखो भाविक नतमस्तक
म. टा. वृत्तसेवा, अकोले
महाराष्ट्रातील आदिवासी भिल्ल समाजाचे कुलदैवत व पिंपळदरी ग्रामस्थांचे ग्रामदैवत येडुबाई देवीच्या यात्रेनिमित्ताने लाखो भाविक आपल्या कुटुंबासह पायी चालत येऊन नतमस्तक झाले. या वर्षी भाविकांनी यात्रेमध्ये गर्दीचा उच्यांक गाठल्याची माहिती ग्रामस्थांच्या वतीने देण्यात आली.
चैत्र पौर्णिमेच्या दुसऱ्या दिवसापासून पहाटे देवीला अभिषेक घालून यात्रेची सुरुवात झाली. यावर्षी देवीच्या पूजेचा पहिला मान गणेश भाऊसाहेब रंधे या भाविकाला मिळाला. सकाळी मांडव डहाळे व चोळी पातळ, वाजतगाजत मिरवणुकीने आणण्यात आले. सायंकाळी देवीची पालखी व मानाच्या काठ्यांची मिरवणूक उत्साहात पार पडली. या वेळी भाविकांच्या गर्दीवर नियंत्रण आणताना पोलिस प्रशासनाला कसरत करावी लागली. त्यानंतर भाविकांच्या नवसपूर्तीचा कार्यक्रम पार पडला. रात्री छबिना झाल्यावर लोकनाट्य तमाशा मंडळाचा मनोरंजनाचा कार्यक्रम झाला. दुसऱ्या दिवशी मातीतील कुस्त्यांचा आखाडा पार पडला.
यात्रेमध्ये पोलिस निरीक्षक अविनाश शिळीमकर यांच्या मार्गदर्शनाखाली चोख बंदोबस्त तैनात करण्यात आला होता. भाविकांच्या सोयीसाठी जागोजागी पोलिस मदत केंद्रे उभारण्यात आली होती. यंदा मुळा नदीला भरपूर पाणी असल्याने आपत्ती व्यवस्थापनाच्या पट्टीच्या पोहणाऱ्या १२ मुलांची नेमणूक करण्यात आली होती. त्यांनी नदीत बुडणाऱ्या १२ भाविकांचे प्राण वाचवल्याची माहिती दिली. तालुका आरोग्य अधिकाऱ्यांच्या मार्गदर्शनाखाली कोतूळ प्राथमिक आरोग्य केंद्राच्या कर्मचाऱ्यांनी भाविकांच्या आरोग्यविषयक तक्रारी घेऊन त्यावर उपचार केले. या वर्षीच्या यात्रेचे संपूर्ण व्हिडिओ शूटिंग दोन दिवस ड्रोन कॅमेऱ्याच्या साहाय्याने करण्यात आले. यात्रा निर्विघ्नपणे पार पाडण्यासाठी येडुबाई देवस्थान ट्रस्ट, ग्रामपंचायत, वन व्यवस्थापन समिती, पिंपळदरी ग्रामस्थ व स्वयंसेवकांनी गेले पाच दिवसांपासून परिश्रम घेतले.
चौकट :
यात्रेत शेकडो जनावरांची हत्या
येडुबाई गडावर होणाऱ्या विकासकामांसाठी दरवर्षी यात्रेमध्ये देणगी पावत्या फाडल्या जातात; मात्र, याला दिलीप बर्डे व अप्पा बर्डे आणि त्यांच्या कार्यकर्त्यांनी यात्रेच्या आदल्या दिवशी विरोध दर्शविल्याने काही काळ वातावरण तंग झाले होते; मात्र, नंतर चर्चा करून या वादावर पडदा पडला. तर शेकडो कोंबड्या, बकऱ्यांची आहुती देण्यात आली. पोलिस बंदोबस्त असूनही अवैदध दारूही जोरात असल्याचे चित्र पाहायला मिळाले.