म. टा. वृत्तसेवा, पारनेर
नगर-पुणे महामार्गावरील जातेगाव घाटात वाहनाच्या धडकेने बिबट्याचा जागीच मृत्यू झाला. अपघातानंतर वाहनचालक पळून गेला असून शवविच्छेदनानंतर बिबट्याचे वन विभागाच्या हद्दीत दफन करण्यात आले.
याबाबतची माहिती अशी की, पारनेर तालुक्याच्या हद्दीत येणाऱ्या जातेगाव घाटात सोमवारी रात्री पावणे आठच्या सुमारास बिबट्या रस्ता ओलांडत होता. त्याचवेळी भरधाव वाहनाने बिबट्याला जोराची धडक दिली. या वेळी थांबलेले प्रवाशी व परिसरातील ग्रामस्थांनी बिबट्याला पाणी पाजून जीव वाचवण्याचा प्रयत्न केला. अंतर्गत रक्तस्राव झाल्याने बिबट्याचा जागीच मृत्यू झाला. संबंधित वाहन घटनास्थळावरून पसार झाले. वनमजूर बंडू गोरे यांना घटनेची माहिती दिली. बिबट्याला खासगी वाहनाने पारनेर येथील वन विभागात आणले. सकाळी बिबट्याचे शवविच्छेदन झाल्यानंतर वन जमिनीत अंत्यसंस्कार करण्यात आले.
पारनेर तालुक्यातील जातेगावसह महामार्गालगत मोठ्या प्रमाणात वनजमिनी आहेत. त्यामुळे या परिसरात हरीण, ससे, लांडगे, तरस, खोकड अशा वन्य प्राण्यांसह बिबट्यांचाही वावर वाढला आहे. आठ दिवसांपासून परिसरातील नागरिकांना बिबट्याचे दर्शन होत होते. यापूर्वीही पाणी व चाऱ्याच्या शोधात असलेल्या अनेक वन्य प्राण्यांचा मृत्यू झाला आहे. त्यामुळे वन विभागाने वन्य प्राण्यांचे मृत्यू टाळण्यासाठी उपाययोजना करण्याची गरज आहे.