म. टा. प्रतिनिधी, नगर
संकटग्रस्त महिलांसाठी आधार ठरणाऱ्या 'वन स्टॉप सेंटर' अर्थात 'दिलासा सेल'ची इमारत बांधण्यासाठी लवकर जागा उपलब्ध करून देण्याच्या सूचना जिल्हा रुग्णालयातील अधिकाऱ्यांना जिल्हाधिकारी राहुल द्विवेदी यांनी दिल्या आहेत. शनिवारी जिल्हाधिकारी कार्यालयात दिलासा सेल समितीची जिल्हाधिकाऱ्यांच्या अध्यक्षतेखाली बैठक झाली. या बैठकीमध्ये दिलासा सेलसाठी जिल्हा रुग्णालयाच्या आवारात जागा मिळावी, यावर सविस्तर चर्चा झाली.
संकटग्रस्त महिलांसाठी केंद्र सरकार पुरस्कृत दिलासा सेंटर (वन स्टॉप सेंटर) ही योजना सुरू झाली. याअंतर्गत महिलांना एकाच इमारतीमध्ये आरोग्य सेवा, विधी व समुपदेशन सेवा, निवारा, पोलिस मदत आदी सुविधा उपलब्ध करुन दिल्या जातात. सध्या हे सेंटर औरंगाबाद रोडवरील पोलिसांच्या इमारतीत आहे. मात्र, ही इमारत प्राधान्याने जिल्हा शासकीय रुग्णालय परिसरात असणे आवश्यक आहे. त्यामुळे त्याबाबत अहवाल सादर करुन त्वरीत काम सुरू करण्याच्या सूचना जिल्हाधिकारी द्विवेदी यांनी दिल्या आहेत. बैठकीला अतिरिक्त पोलिस अधीक्षक जयंत मीना, महिला व बालविकास विभाग अधिकारी विजयमाला माने, जिल्हा रुग्णालयातील डॉ. आशिष कोकरे, अशासकीय सदस्य संध्या मेढे, अनिता माने, दिलासा सेलच्या प्रभारी अधिकारी पोलिस उपनिरीक्षक कल्पना चव्हाण, बाल कल्याण समितीचे अध्यक्ष हनीफ शेख आदी उपस्थित होते.
'वन स्टॉप सेंटर'ची इमारत बांधण्यासाठी ४८ लाख ६९ हजार ३७२ रुपयांचा निधी उपलब्ध झाला आहे. मात्र, इमारत बांधण्यासाठी जागा निश्चित नसल्यामुळे निधी खर्च करता येत नसल्याची माहिती बैठकीत देण्यात आली. केंद्र सरकारच्या येाजनेत नमूद केल्यानुसार 'दिलासा सेल'हा जिल्हा सरकारी रुग्णालय परिसरात किंवा तेथून दोन किलोमीटरच्या अंतरावर असणे बंधनकारक आहे. त्यामुळे जिल्हा रुग्णालयात या सेलचे स्थलांतर व्हावे, अशी मागणी समितीने केली. यावर जिल्हा रुग्णालयात बांधकामासाठी जागा उपलब्ध करून देण्याच्या सूचना देण्यात आल्या आहेत. दरम्यान, या बैठकीमध्ये दिलासा सेलतर्फे गेल्या वर्षभरात राबवण्यात आलेल्या कामगिरी व कामकाजाची माहिती पोलिस उपनिरीक्षक कल्पना चव्हाण यांनी दिली.