जानकरांना फोन करणे शेतकऱ्याला पडले महागात

नगर : राज्याचे पशुसंवर्धन व दुग्ध विकास मंत्री महादेव जानकर यांना फोन करणे नगर तालुक्यातील एका शेतकऱ्याला चांगलेच महागात पडले. 'शेतकऱ्यांना आताच का पाठिंबा देता, इतके दिवस कोठे होता?' असा प्रश्न या शेतकऱ्याने विचारला होता. या शेतकऱ्याला पोलिस शोधत असून त्यासाठी त्याच्या वडिलांनाही काही काळ ताब्यात घेण्यात आले होते.

मांडवे (ता. नगर) येथील शेतकरी सदाशिव मारुती निमसे यांनी दुपारी जानकर यांना फोन केला. सध्या सुरू असलेल्या दूध दराच्या पार्श्वभूमीवर त्यांनी जानकर यांना पाठिंब्याबाबत विचारणा केली. जानकर यांनी 'प्रत्यक्ष येऊन बोला,' असे उत्तर दिले. त्यावर निमसे यांनी चढ्या आवाजात तोच प्रश्न केल्यावर जानकर यांनी फोन कट केला.

त्यानंतर काही वेळातच पोलिस निमसे यांच्या घरी आले. त्यावेळी ते घरी नव्हते. त्यामुळे त्यांचे वडिल मारुती निमसे (वय ५५) यांना पोलिस ठाण्यात नेण्यात आले आणि सायंकाळी सोडून देण्यात आले. निमसे यांच्या शोधासाठीही पोलिस गेले असल्याचे सांगण्यात आले. याबाबत नगर तालुका पोलिस स्टेशनचे सहायक पोलिस निरीक्षक किशोर परदेशी यांच्याशी संपर्क साधला असता त्यांनी सांगितले की, 'दूध दर आंदोलनाच्या पार्श्वभूमीवर अनेकांची धरपकड सुरू आहे, मांडवे गावातील काही जणांनाही ताब्यात घेतले होते. फोनसंबंधी आमच्याकडे कोणाचीही तक्रार नाही.'