वडिलांचा निर्घृण खून करणाऱ्याला अटक

कर्जत : लग्न करून देत नाहीत, म्हणून वडिलांचा कुऱ्हाडीने वार करून निर्घृण खून करणाऱ्या मिथून विकास काळे (वय २५, रा. हिंगणगाव, ता. कर्जत) यास कर्जत पोलिसांनी बुधवारी मध्यरात्री सापळा रचून अटक केली.

या बाबत मिळालेली माहिती अशी की, कर्जत तालुक्यातील भांबोरा येथे गेल्या वर्षी २०१७ मध्ये मिथून काळे याने, 'माझे लग्न करून द्या, असे वडील विकास यांना वांरवार सांगितले; मात्र, वडील लग्न लावून देत नाहीत, याचा राग येऊन मिथून याने वडिलांवर भरदिवसा कुऱ्हाडीने वार करून त्यांचा निर्घृण खून केला. यानंतर तो फरारी झाला होता.

उपविभागीय पोलिस अधिकारी सुदर्शन मुंडे यांना बुधवारी मिथून काळे हा भांबोरा परिसरामध्ये येणार असल्याची माहिती मिळाली. त्यानुसार त्यांनी त्यांच्याकडील गुन्हेगारांची माहिती असणारे हेड कॉन्स्टेबल अंकुश ढवळे यांना याची माहिती देऊन आरोपी मिथून काळे यास पकडण्याबाबत सूचना दिली. ढवळे यांनी पोलिस कॉन्स्टेबल मेहेत्रे, पोलिस कॉन्स्टेबल उमेश गायकवाड व काळे, पोलिस मित्र यांना सोबत घेऊन सापळा रचून त्यास अटक केली आहे. मिथून काळे याच्यावर इतरही अनेक गुन्हे दाखल असून तेही या अटकेमुळे उघड होण्याची शक्यता पोलिसांनी वर्तविली आहे.