म. टा. वृत्तसेवा, नेवासे
तालुक्यातील खडका फाटा ते सलबतपूर रस्त्यावर दरोड्याच्या तयारीत असलेल्या श्रीरामपूरच्या टोळीला पोलिसांनी पकडले. या कारवाईत पाच दरोडेखोरांना अटक करण्यात आली असून कारसह एकूण १० लाखांचा मुद्देमाल जप्त करण्यात आला आहे.
खडका फाटा ते सलबतपूर रस्त्यावर एक गाडी व काही व्यक्ती संशयास्पदरित्या फिरत असल्याची गुप्त माहिती प्रभारी पोलिस निरीक्षक शरद गोर्डे यांना मिळाली. गुप्त माहितीच्या आधारे गोर्डे यांच्या नेतृत्वाखाली नेवासे पोलिसांनी खासगी वाहनाने जाऊन सलबतपूर रस्त्यावर सापळा लावला. सलबतपूर रस्त्यावरील आडव्या चारीनजीक एक कार दिसून आली. त्या कारशेजारी पाच व्यक्ती संशयास्पद हालचाली करत असतानाच पोलिसांनी त्यांना पकडले. पकडलेल्यांमध्ये सुजित भिकन देवकुळे (वय २६, रा. हरेगाव रोड, श्रीरामपूर), संदीप एकनाथ ढगे (वय २६, रा. खोकर, श्रीरामपूर), रोहन विलास शिंदे (वय २५, रा. पंचशीलनगर, चाळीसगाव, जि. जळगाव), अभिजीत मधुकर जोंधळे (वय २५, रा. संगमनेर रोड, श्रीरामपूर), दीपक बाबासाहेब शेटे (वय २३, रा. संजयनगर, श्रीरामपूर) या पाच जणांचा समावेश आहे.