चोरी करणारी महिलांची टोळी सक्रीय

म. टा. प्रतिनिधी, नगर

बाजारपेठेत चोऱ्या घरणाऱ्या बंद घरे फोडून दागिने पैसे लुटणाऱ्या महिलांच्या टोळ्या शहरात सक्रीय झाल्या आहेत. गेल्या काही दिवसांत कोतवाली पोलिस स्टेशनला अशा अज्ञात महिलांच्या टोळ्यांविरुद्ध गुन्हे नोंदविण्यात आले आहेत. परंतु या टोळ्या गजांआड करण्यात कोतवाली पोलिसांना अपयश येत आहे.

कापड दुकानदार, सराफ व्यवसायिकांना या टोळ्यांचा फटका बसला आहे. गंजबाजार येथील संजय रामप्रसाद वर्मा यांच्या दुकानातून बुरखा घातलेल्या दोन महिलांनी ४२ हजार रुपये किंमतीची सोन्याची चैन चोरून नेल्याचा गुन्हा नोंदविण्यात आला आहे. या दुकानांतील सीसीटीव्ही कॅमेरे तपासल्यानंतर चोरी झाल्याचे उघडकीस आले. बुरखा घातलेल्या दोन महिला वर्मा यांच्या दुकानात आल्या होत्या. सोन्याची चैन खरेदी कराय़ची असल्याचे या महिलांनी वर्मा यांना सांगितले. एका ट्रेमध्ये ठेवलेल्या चैन महिला बघत होत्या. त्याचवेळी दुकानदाराची नजर चुकवत या महिलांनी १४ ग्रॅम वजनाची सोन्याची चैन चोरली. त्याचवेळी त्यांच्याकडील बेनटेक्सची चैन ही ट्रे मध्ये ठेवली. चैन पसंत नसल्याचे सांगून या महिला दुकानातून निघून गेल्या होत्या. त्यानंतर ट्रेमधील एक चेन बेनटेक्सची असल्याचे दुकानदाराच्या लक्षात आले. त्यात या चोरीचा प्रकार उघडकीस आल्यानंतर शिवम संजय वर्मा यांच्या फिर्यादीवरून अज्ञात दोन महिलांविरुद्ध कोतवाली पोलिस स्टेशनला चोरीचा गुन्हा नोंदविण्यात आला आहे. गेल्या आठवड्यात आनंदऋषीजी हॉस्पिटलजवळील एका बंगल्याचा दरवाजा तोडून महिलांनी सोन्याचे दागिने व पैसे चोरून नेले होते. ही चोरी सीसीटीव्ही कॅमेऱ्यामध्ये कैद झाली आहे. चार महिला दुपारी चोरी करण्यासाठी बंगल्यात आल्या होत्या. बंगल्याच्या दरवाजाचे लाकडी कप्पे सहजपणे काढून या महिला बंगल्य़ात घुसल्या. बंगल्यातील कपाटाची उचकापाचक करून दागिने व पैसे घेऊन त्या निघून गेल्या असल्याचे सीसीटीव्ही फुटेज दिसत आहे. सीसीटीव्ही फुटेज तपासासाठी उपलब्ध असले तरी पोलिसांना या टोळ्यापर्यंत पोहचता येत नाही. त्यामुळे या टोळ्या काही दिवस शांत बसून पुन्हा शांत बसतात.

बंद घरफोड्यांचा संशय

नगर शहरात घरफोड्या करणाऱ्या सरार्ईत गुन्हेगारांच्या टोळ्याचा मुसक्या पोलिसांना आवळल्या असल्या तरी दुपारच्या वेळेच्या घरफोड्या थांबलेल्या नाहीत. अपार्टमेंमध्ये दुपारच्या वेळेत घरे बंद असतात. त्यावेळी टोळ्यातील महिला अशा अपार्टमेंटमध्ये घुसतात. जवळच्या बनावट चाव्यांच्या साह्याने कुलूप उघडून घरात प्रवेश करून चोरी करून निघून जातात. कोतवाली पोलिस स्टेशनच्या हद्दीत विनायकनगर येथे दोन दिवसांपूर्वी अशा पद्धतीची चोरी झाली आहे. शहरात दुपारच्या वेळी घरफोड्या करणाऱ्या महिलांच्या टोळ्या असल्याचा संशय पोलिसांना आहे.