तिजोरी चोरणारी
टोळी गजांआड
म. टा. प्रतिनिधी, नगर
नगर शहरातील तारकपूर बसस्टँडसमोरील प्रेरणा आर्केड या बिल्डिंगमधील आर. आर. कपूर कन्ट्रक्शन कंपनीचे ऑफिस फोडून अवजड तिजोरी व पैसे चोरणारी टोळी तोफखाना पोलिसांनी गजांआड केली. पुरावे नष्ट करण्यासाठी घटनास्थळावरील सीसीटीव्ही कॅमेऱ्याचा डीव्हीआर चोरट्यांनी लांबविला होता. त्यानंतर पोलिस तपास करत ही टोळी जेरबंद केली.
आय्युब कासम सयद्द (घासगल्ली, नगर), अजयसिंह पोपटसिंग परदेशी (वंजार गल्ली, नगर) या दोघांना अटक केल्यानंतर टकलू ऊर्फ इसरार शेख व वसीम शेख या दोघांची नावे उघड झाली. अजयसिंह परदेशी हा आर. आर. कपूर कंपनीकडे नोकरीला होता. त्याच्या सांगणाऱ्यावरून पैसे व तिजोरी चोरीला गेली होती. चोरलेली अवजड तिजोरी बुरुडगाव रोड येथील एका नाल्यातील गाळात टाकून दिली होती. ही तिजोरी, तिजोरीमधील रोख रक्कम व सोन्याच्या नाण्यांबरोबर चोरीसाठी वापरलेली हातोडी, तिजोरीचा दरवाजा तोडण्यासाठी वापरण्यात आलेली वेल्डिंग मशिन जप्त केले. पोलिस निरीक्षक सुरेश सपकाळे, पोलिस उपनिरीक्षक संजयकुमार सोने व इतर पोलिस कर्मचाऱ्यांनी ही टोळी गजांआड केली.