म. टा. वृत्तसेवा, पाथर्डी
सेंट्रिंगचे काम करणाऱ्या दोन तरुणांनी आपल्याच मालकाच्या घरी चोरी केल्याचा प्रकार शनिवारी (१६ फेब्रुवारी) उघडकीस आला. या दोन्ही चोरट्यांना भोसे येथील ग्रामस्थांनी पकडून पोलिसांच्या स्वाधीन केले आहे. लोहसर येथील काळभैरवनाथ मंदिरातील चोरीतही या दोन्ही तरुणांचा हात असल्याचा संशय व्यक्त केला जात आहे. याबाबत अधिक माहिती अशी की, ' भोसे येथील रहिवासी अमोल टेमकर यांचा सेंट्रिंगचा व्यवसाय आहे. दहा दिवसांपूर्वी त्यांच्या राहत्या घरातून ४० हजार रुपयांचे दागिने चोरीस गेले होते. या संदर्भात टेमकर यांच्या पत्नी शीतल यांनी पोलिसात तक्रार सुद्धा दाखल केली होती. अमोल टेमकर यांना ही चोरी आपल्या हाताखाली काम करणारे नोकर केशव सावंत (रा. जोहारवाडी) व गुलाब दानवे (रा. खांडगाव) यांनी केली असावी, असा संशय होता. टेमकर यांनी आपल्याला फोन लावायचा आहे, असे सांगत केशव सावंत याच्याकडून त्याचा मोबाइल थोड्यावेळासाठी मागून घेतला. त्यामध्ये टेमकर यांच्या घरी पाच फेब्रुवारीला जी दागिन्यांची चोरी झाली होती, त्याची संपूर्ण माहिती सावंत याने आपल्या इतर साथीदारांना दिली असल्याचे बोलणे पूर्णपणे रेकॉर्ड झाल्याचे टेमकर यांना आढळून आले. त्यानंतर टेमकर यांनी तातडीने ही माहिती भोसे येथील ग्रामस्थांना दिली. यानंतर ग्रामस्थांनी सावंत व दानवे या दोघांनाही चोप दिला असता त्यांनी केलेल्या गुन्ह्याची कबुली दिली. पोलिस निरीक्षक रमेश रत्नपारखी यांनी सावंत व दानवे या दोघा तरुणांना ताब्यात घेतले. या वेळी काही साथीदारांसह आम्ही शेवगाव तालुक्यातून काही दुचाकी व इलेक्ट्रिक मोटारींची चोरी सुद्धा केली असल्याचे ग्रामस्थांसमोर आरोपींनी कबूल केले.