भीमशाहीर दादू
साळवे यांचा गौरव
नगर : मागील ३५ वर्षांपासून बुद्धगीते व भीमगीते गाणारे येथील अंध कलावंत दादू नाना साळवे यांचा विशेष गौरव समारंभ नुकताच येथे झाला. दलितमित्र जे. बी. निकुंभ (निकम सर) यांच्या हस्ते साळवे यांचा गौरव करून त्यांना ३१ हजारांची थैली (आर्थिक मदत) देण्यात आली. या वेळी मनपाचे यंत्र अभियंता परिमल निकम, सुरेश खरात, संजय भिंगारदिवे, भारिपचे जिल्हाध्यक्ष पी. के. गवारे, संदीप वाघमारे, दीपक पाटोळे आदींसह अन्य उपस्थित होते.
ज्येष्ठ कलावंत वामनदादा कर्डक यांचे शिष्य असलेले दादू साळवे बुद्धगीते व भीमगीते गाणारे प्रसिद्ध कलावंत आहेत. मात्र, त्यांची आर्थिक स्थिती नाजूक असल्याने समाजबांधवांकडून त्यांना आर्थिक मदत देण्यासाठी त्यांच्या गौरव समारंभाचे आयोजन करण्यात आले होते. डॉ. आंबेडकर भवन व शाहू बॉइज ग्रुप यांनी यासाठी पुढाकार घेतला होता. या वेळी निकुंभ यांनी साळवे यांच्या कार्याचा गौरव केला. फुले-शाहू-आंबेडकर चळवळीच्या सामाजिक अभियानाचे ते जिल्ह्याचे नायक आहेत, असे गौरवोद्गारही काढले. या निमित्ताने वामनदादा कर्डक यांच्या गीतांचे संकलन करून त्यांचे प्रकाशन करणारे माधवराव गायकवाड व एकनाथराव गायकवाड यांचा या वेळी सत्कार करण्यात आला. कार्यक्रमास शिरीष जाधव, विकास गायकवाड, किरण दाभाडे, संध्या मेढे, किरण भिंगारदिवे, अनिल जाधव आदींसह अन्य उपस्थित होते. शाहीर डंबाळे, दिलीप शिंदे, दादू साळवे, भीमराव साळवे, मिलिंद शिंदे, रोकडे, अर्जुन साळवे, शंकर गायकवाड, वसंत उमाप आदींची भीमगीतांची मैफल रंगली. दरम्यान, दादू साळवे यांना समाजबांधवांद्वारे आणखी आर्थिक मदत करण्याचे प्रयत्न सुरू आहेत. साळवे यांना आर्थिक मदत देऊ इच्छिणारांनी ९६७३९१८२९१ यावर संपर्क साधावा.
.................