दोन दिवसांत मान्सूनपूर्व पावसाची शक्यता

म. टा. प्रतिनिधी, नगर

अरबी समुद्रात आलेले 'मिकून' वादळ शांत झाल्याने येत्या दोन-तीन दिवसांत महाराष्ट्रात मान्सूनपूर्व पाऊस येण्याची शक्यता आहे. दक्षिण महाराष्ट्रातून सुरू झालेला हा पाऊस पश्चिम महाराष्ट्र व मराठवाडाही व्यापण्याचा अंदाज येथील हवामानाचे अभ्यासक प्रा. बी. एन. शिंदे यांनी वर्तविला आहे.

यासंबंधी माहिती देताना शिंदे यांनी सांगितले की, गेल्या आठवड्यात दक्षिण महाराष्ट्रात मान्सूनपूर्व पावसाचे आगमन झाले होते. मात्र, चार-पाच दिवंसापूर्वी अरबी समुद्रात मिकून चक्रीवादळ तयार झाले. ते प्रथम आफ्रिकेकडे व नंतर ओमानकडे गेल्याने महाराष्ट्रातील बाष्पयुक्त ढग तिकडे खेचले गेले. त्यावेळी उत्तर भारतातली उष्ण हवा महाराष्ट्राकडे खेचली गेली. त्यामुळे पाऊस तर थांबलाच; मात्र काही भागात तापमान वाढले. पूर्व भारतात पाऊस झाला आहे. तिकडील बाष्पयुक्त वारे महाराष्ट्राकडे वाहण्यास सुरुवात झाली आहे. वादळ क्षमल्याने त्याने खेचलेले ढगही मुक्त होऊन पुन्हा महाराष्ट्राकडे खेचले जात आहेत. त्यामुळे पावसाची शक्यता आहे. जोराचा वारा आणि विजांच्या कडकडाटासह पाऊस होण्याची शक्यता आहे. त्यामुळे शेतकऱ्यांनी स्वतःची आणि शेतीमालाची योग्य ती काळजी घ्यावी, असे आवाहन त्यांनी केले.