म. टा. प्रतिनिधी, नगर
न्यू आर्टस्, कॉमर्स अँड सायन्स कॉलेजच्या संज्ञापन अभ्यास विभागाच्या वतीने कॉलेजच्या सभागृहात 'लोकशाही व माध्यममुल्ये' या संकल्पनेवर आधारीत १३ व्या प्रतिबिंब चित्रपट महोत्सवास शनिवारी उत्साहात सुरुवात झाली. महोत्सवात पहिल्या दिवशी 'पिपली लाईव्ह', 'द पोस्ट', 'नाईटकॉलर', 'लाइव्ह फ्रॉम बगदाद' हे चित्रपट दाखवण्यात आले. सर्वांसाठी मोफत प्रवेश असलेल्या या महोत्सवाला पहिल्याच दिवशी रसिकांचा भरभरून प्रतिसाद मिळाला.
चित्रपटमहर्षी दादासाहेब फाळके यांच्या स्मृतीदिनानिमित्त दरवर्षी संज्ञापन अभ्यास विभागाच्या वतीने प्रतिबिंब चित्रपट महोत्सवाचे आयोजन करण्यात येते. या चित्रपट महोत्सवाची सुरुवात शनिवारी झाली. १८ फेब्रुवारीला त्याचा समारोप होणार आहे. महोत्सवात 'लोकशाही व माध्यममुल्ये' या विषयावरील चित्रपट दाखवण्यात येत आहेत. याशिवाय दिवंगत ज्येष्ठ अभिनेते डॉ. श्रीराम लागू व गिरीश कार्नाड यांना श्रद्धांजली म्हणून रविवारी सायंकाळी साडेचार वाजता 'पिंजरा' व सोमवारी सकाळी नऊ वाजता 'निशांत' हे चित्रपट दाखवण्यात येणार आहेत. त्यानंतर सोमवारी दुपारी एक वाजल्यापासून माहितीपट व लघुपट स्पर्धेला सुरुवात होणार आहे.
महाविद्यालयाचे प्राचार्य डॉ. बी. एच. झावरे यांच्या मार्गदर्शनाखाली चित्रपट महोत्सवाचे संचालक अभिजीत गजभिये, संज्ञापन अभ्यास विभागाचे प्रमुख प्रा. संदीप गिऱ्हे, प्रा. डॉ. बापू चंदनशिवे, प्रा. अनंत काळे, प्रा. श्वेता बंगाळ व प्रा. सुमीत भिंगारे यांच्यासह विभागाचे विद्यार्थी हा महोत्सव यशस्वी होण्यासाठी परिश्रम घेत आहेत.
......
आज दाखवले जाणारे चित्रपट
चित्रपटाचे नाव वेळ
द ग्रेट हॅक सकाळी ९ ते ११:३०
स्पॉटलाइट दुपारी १ ते ३:४५
पिंजरा सायंकाळी ४:३० ते रात्री ८
......