संपात सहभागामुळे महामंडळाची कारवाई; कामगार संघटनांचा विरोध
म. टा. प्रतिनिधी, नगर
एसटी कामगारांनी पुकारलेला अघोषित संप मिटल्यानंतर या संपात सहभागी झालेल्या कामगारांवर कारवाई करण्यास महामंडळाने सुरुवात केली आहे. महामंडळात विविध विभागांत रोजंदारी तत्वावर काम करणाऱ्या कर्मचाऱ्यांना कामावरून काढून टाकण्यात आले आहे. महामंडळाने स्थानिक अधिकाऱ्यांना दिलेल्या सूचनांप्रमाणे ही कारवाई करण्यात आली आहे. महामंडळाच्या या कारवाईने कामगारांमध्ये खळबळ उडाली आहे. कामगार संघटनांनीही या कारवाईस विरोध केला असून याविरोधात न्यायालयात दाद मागण्याचा इशारा दिला आहे.
एसटी महामंडळाने जाहीर केलेली वेतनवाढ मान्य नसल्याने ८ जून रोजी अचानक संप पुकारण्यात आला होता. या संपाचा परिणाम राज्यभर दिसून आला. आगारांतील वाहतूक जवळपास ठप्प झाली होती. नगर विभागातील वाहतूकही थांबली होती. वाहतूक थांबल्याने महामंडळास कोट्यवधींच्या उत्पन्नावर पाणी सोडावे लागले. त्यानंतर आता संप मिटल्यावर या संपात सहभागी झालेले कामगार महामंडळाच्या रडारवर आले आहेत. महामंडळाच्या विविध विभागांत रोजंदारीवर काम करणाऱ्या कर्मचाऱ्यांवर बेरोजगार होण्याची वेळ आली आहे. या कर्मचाऱ्यांना कामावरून काढून टाकण्यात आले आहे. मंगळवारी सकाळीच स्थानिक अधिकाऱ्यांनी कर्मचाऱ्यांचे काम थांबवले आहे. नगर विभागातील जवळपास ३६ कर्मचाऱ्यांना कामावरून काढून टाकल्याचे सांगण्यात आले. महामंडळात हे कर्मचारी नव्याने रुजू झाले होते. महामंडळाच्या या निर्णयामुळे कामगारांतून तीव्र नाराजी व्यक्त केली जात आहे. कामगार संघटनेच्या पदाधिकाऱ्यांनी स्थानिक अधिकाऱ्यांशी चर्चा करून कारवाई मागे घेण्याची मागणी केली होती; परंतु, याचा काहीही उपयोग झाला नाही. या निर्णयात अद्याप कोणताही बदल झालेला नाही.
कामगार संघटना जाणार न्यायालयात
महामंडळाच्या या निर्णयाचा मान्यताप्राप्त कामगार संघटनेने विरोध केला आहे. महामंडळाची ही कृती नियमबाह्य असल्याचे स्पष्ट करत कारवाई मागे घेण्याची मागणी महामंडळाच्या उपाध्यक्षांकडे करण्यात आली आहे. महामंडळात शिस्त व अपील कार्यपद्धतीचे नियम ठरलेले आहेत. त्यातील तरतुदींनुसार कार्यवाही होणे अपेक्षित असताना शिस्त व आवेदन कार्यपद्धतीच्या तरतुदींचा भंग करून कर्मचाऱ्यांना कामावरून काढून टाकले आहे. प्रशासनाची ही कृती नियमबाह्य आहे. प्रशासनाने कारवाई थांबवावी तसेच प्रशासनाने अनुचित कामगार प्रथेचा अवलंब केल्याबाबत संघटना न्यायालयात दावा दाखल करणार असल्याचे महाराष्ट्र स्टेट ट्रान्सपोर्ट कामगार संघटनेने प्रसिद्धीस दिलेल्या निवेदनात म्हटले आहे.
संघटनांचे पदाधिकारी रडारवर
महामंडळाने विनंती बदलीसाठी अर्ज केलेल्या कामगारांपैकी संपात सहभागी झालेल्या कामगारांची माहिती याआधीच मागवली आहे. त्यानंतर आता कामगार संघटनेचे पदाधिकारी रडारवर आले आहेत. या पदाधिकाऱ्यांची माहिती प्रशासनाने स्थानिक कार्यालयांकडून मागवली आहे. कार्यालयांकडून माहिती पाठवण्याचे काम सुरू आहे. या माहितीच्या आधारे महामंडळ काय कारवाई करणार याबाबत मात्र अजून काहीही स्पष्ट झालेले नाही. परंतु, मंगळवारी दिवसभर पदाधिकारी व कामगारांत याबाबत चर्चा सुरू होती.