नगरमध्ये आगळीवेगळी स्पर्धा; 'हायजिन फर्स्ट'चा पुढाकार
म. टा. प्रतिनिधी, नगर
दिवाळीच्या काळात घरोघरी होणाऱ्या लाडू, शेव, चकली, चिवडा, शंकरपाळी, अनारसे, करंजी... अशा अनेकविध फराळाच्या पदार्थांना यंदाच्या दिवाळीत चक्क बक्षिसे मिळणार आहेत. अर्थात पूर्ण स्वच्छता राखून व दर्जेदार कच्चे साहित्य वापरून तयार केलेल्या फराळाच्या पदार्थांनाच अशी हायजिन फराळ बक्षिसे दिली जाणार आहेत. येथील हायजिन फर्स्ट चळवळीने या स्पर्धेचे आयोजन केले आहे.
येथील गृहिणी वैशाली गांधी यांनी तीन वर्षांपासून हायजिन फर्स्ट चळवळ नगरमध्ये सुरू केली आहे. शहरातील विविध हॉटेल्स, मिठाईची दुकाने, तसेच चहाच्या टपऱ्यांसह छोट्या-मोठ्या खाद्यपदार्थांच्या स्टॉलधारकांमध्ये जनजागृती करून खाद्यपदार्थ तयार करताना स्वच्छता राखावी, कामगारांचे आरोग्य जपावे, कच्चा माल चांगला वापरावा, पदार्थ तयार करण्यासाठीच्या यंत्रसामग्रीच्या नियमित देखभाल दुरुस्तीबाबत पाठपुरावा केल्याने अशा अनेक व्यावसायिकांची ठिकाणे स्वच्छ झाली आहेत. हीच हायजिन फर्स्ट संकल्पना आता घरोघरी रुजण्यासाठी त्यांनी यंदाच्या हायजिन दिवाळी फराळाला बक्षिसांनी गौरवण्याचे नियोजन केले आहे.
दहा नियम पाळावे लागणार
यंदाचा 'दिवाळी फराळ : हायजिन फर्स्ट फराळ' ही स्पर्धा घरोघरी तयार होणाऱ्या दिवाळीसाठीच्या फराळांसाठी आहे. येत्या २४ ऑक्टोबरपर्यंतच्या कालावधीत ही स्पर्धा होणार असून, शहरातील सर्व गृहिणींना यात खुला व मोफत प्रवेश आहे. मात्र, या स्पर्धेत सहभागी होण्यासाठी १० निकष पाळावे लागणार आहेत. किचन व स्टोअर रूम स्वच्छ असावे, फराळासाठीचा कच्चा माल व्यवस्थित व स्वच्छ निवडलेला असावा, तेलाचा पुनर्वापर शक्यतो करू नये वा केलेला नसावा, फराळ करताना सहायक कामगार स्त्रिया असतील, तर त्यांनी वैयक्तिक स्वच्छता राखावी, पदार्थ बनविण्य़ासाठीचा गॅसचा ओटा व फरशी स्वच्छ असावी, फराळ सुकवण्यासाठी न्यूज पेपरचा (वृत्तपत्र कागद) वापर केलेला नसावा, फराळ तयार करणाऱ्याने अॅप्रन व कॅप घालणे, तसेच नखे स्वच्छ ठेवणे बंधनकारक असेल. फराळ करताना भांडी स्वच्छ धुतलेली असावीत, पदार्थ बनवताना स्वच्छतेची काळजी घेणे बंधनकारक असेल. अशा नियमांचे पालन करणाऱ्या परिवारांना हायजिन फर्स्टतर्फे पुरस्कार देण्यात येणार आहेत. सहभागी होऊ इच्छिणारांनी त्यांचे फराळ बनवतानाचे अॅक्शन फोटो, तसेच नाव व पत्ता ९११२८३४९१२ या व्हॉट्सअॅप क्रमांकावर पाठवण्याचे आवाहन करण्यात आले आहे. स्पर्धेत सहभागी झालेल्या स्पर्धकांपैकी हायजिन निकषांचे पालन करणाऱ्या सर्वोत्तम फोटोंचे प्रदर्शनही करण्याचे नियोजन असल्याचे सांगण्यात आले. याशिवाय या स्पर्धेत अन्नसुरक्षा व स्वच्छतेची सर्वोत्तम काळजी घेणाऱ्या स्पर्धकाला हायजिन फर्स्ट मित्र पुरस्काराने सन्मानित करण्यात येणार आहे. 'हायजिन फर्स्ट'चे अधिकृत फेसबुक पेज व 'आय लव नगर' या अॅपवरही या स्पर्धेची माहिती देण्यात आली आहे.
.............