पारनेर : तालुक्यातील पिंप्री जलसेन येथील एका ३९ वर्षीय व्यक्तिचा संशयास्पद आजाराने मृत्यू झाल्यामुळे पारनेर तालुक्यात खळबळ उडाली आहे.
संबंधित मृत व्यक्तीचा स्वॉब तपासणीसाठी घेण्यात आले असून बुधवारी सायंकाळपर्यंत तपासणी अहवाल येईल. त्यानंतरच या मृत व्यक्तिच्या आजाराचे कारण सांगता येईल, अशी माहिती तालुका आरोग्य अधिकारी डॉ. प्रकाश लाळगे यांनी दिली.
याबाबत आरोग्य विभागाकडून मिळालेली माहिती अशी, मुळचा निघोज येथील रहिवासी असलेला हा तरूण मुंबई येथे कामानिमित्त राहात होता. संबंधित व्यक्ती तीन मे रोजी मुंबई येथून त्यांची सासुरवाडी पिंप्री जलसेन येथे कुटुंबासह आला होता. सोमवारी या व्यक्तिला श्वसनाचा त्रास होऊ लागल्याने निघोज येथील ग्रामीण रुग्णालयात उपचारासाठी दाखल करण्यात आले होते. निघोज येथील वैद्यकीय अधिकाऱ्यांना संशय आल्याने नगरच्या जिल्हा सरकारी रुग्णालयात पाठवण्यात आले. मात्र, संबंधित व्यक्ती नगरला रुग्णालयात जाण्याऐवजी परत पिंप्री जलसेन येथे घरी गेला. मंगळवारी (१२ मे) सकाळी व्यक्तीला त्रास वाढल्याने त्याने १०८ क्रमांकाला फोन करून रुग्णवाहिका बोलावली. रुग्णावाहिकेतून नगरच्या जिल्हा रुग्णालयात जात असताना रस्त्यातच त्याचा मृत्यू झाल्याचे नगरच्या वैद्यकीय सुत्रांनी सांगितले. या तरुणाच्या मृत्यूने तालुका हादरला आहे. या व्यक्तिची दोन मुले पिंप्रीजलसेन येथे आजीकडे मळ्यात राहतात. गावापासून दूर असलेली ही वस्ती खबरदारीचा उपाय म्हणून प्रशासनाने सील केली आहे. संबंधित कुटुंबाला कुणीही नातेवाईकांनी भेटण्यास प्रशासनाने बंदी घातली आहे.