सात वर्षांत यंदा सर्वाधिक पाऊस

म. टा. प्रतिनिधी, नगर
गेल्या सातवर्षांत नगर जिल्ह्यात यंदा सर्वाधिक पाऊस झाला असल्याने मुबलक पाणी झाले आहे. या सातवर्षात चार वेळाच शंभर टक्क्यांपेक्षा जास्त पाऊस झाला आहे. शंभर टक्क्यांपेक्षा कमी पाऊस झाल्यास जिल्ह्यात पाणीबाणीची परिस्थिती निर्माण होऊन पाणी पुरवठ्यासाठी टँकरवर करोडे रुपये खर्च करावे लागतात. यंदा मात्र १३८ टक्के पाऊस झाल्याने पुढील उन्हाळ्यात पाणीटंचाई भासणार नाही. तर शेतीला मुबलक पाणी मिळणार आहे.
जून ते ऑक्टोबर या महिन्यांत पाऊस मोजला जातो. कारण ऑक्टोबर महिन्यात नगरच्या दक्षिण भागात जोरदार पाऊस होत असतो. या वर्षी आत्तापर्यंत जिल्ह्यात १३८ टक्के पाऊस झाला आहे. आणखी काही दिवस पावसाचे असल्याने पावसाच्या टक्केवारीत आणखी वाढ होईल. परंतु गेल्या काही वर्षांतील पावसाच्या वार्षिक सरासरीच्या नोंदी पाहिल्या असता यंदा सर्वाधिक पावसाची नोंद झाली आहे. २०११ ते २०१७ पर्यंतच्या पावसाचा आढावा घेतला असता चारवेळा शंभर टक्क्यांपेक्षा कमी पाऊस झाला आहे. तर तीनवेळा शंभर टक्क्यांपेक्षा जास्त पाऊस झाला आहे. २०११ मध्ये ९८ टक्के पाऊस झाला होता. तर २०१२ मध्ये ७७ टक्के पाऊस झाला होता. सलग दोन वर्ष कमी पाऊस झाल्याने जिल्ह्यात पाणीटंचाई, चारा टंचाई निर्माण झाली होती. त्यामुळे जिल्ह्याभर टँकरने पाणीपुरवठा करावा लागत होता. चारा छावण्या सुरू करण्यात आल्या होत्या. त्यानंतर २०१३ मध्ये ११९ टक्के पाऊस झाल्याने दुष्काळ हटला होता. परंतु त्यानंतर सलग २०१४-२०१५ या दोन वर्षात ८० टक्कांपेक्षा कमी पाऊस झाल्याने जिल्ह्यात पुन्हा दुष्काळी परिस्थिती निर्माण झाली होती. धरणात कमी पाणी असल्याने पाणी सोडण्यासाठी आंदोलने झाली होती. शेतीच्या पाण्यासाठी खोल बोअरवेल खोदून शेतीचे चाळण झाली होती. त्यानंतर गेल्या वर्षी १३६ टक्के पाऊस झाल्याने परिस्थिती आटोक्यात आली. तरीही जिल्ह्यात या उन्हाळ्यात काही भागात टँकर सुरू केले होते.
यंदा १३८ टक्के पाऊस झाला असल्याने नद्या, नाले भरून वाहत आहेत. सर्व धरण ही शंभर टक्के भरले असून, धरणांतून पाण्याची विसर्ग सुरू आहे.