अवकाळी पावसाचे तीन बळी

म. टा. प्रतिनिधी, नगर
वादळी अवकाळी पावसाचा जिल्ह्यात जोरदार तडखा बसला आहे. अंगावर वीज पडून एक, तर वीजेचा पोल अंगावर पडून दोघांचा असा तिघांचे मृत्यू झाले. वादळामुळे अनेक गावांतील घरांचे पडझड होऊन नुकसान झाले आहे. नगर व राहाता तालुक्यांतील गावांमधील फळबागांचे नुकसान झाले आहे. या पावसामुळे झालेल्या नुकसानीचे पंचनामे महसूल, कृषी विभागाने सुरू केले आहेत.
गुरुवार दुपारनंतर नगर तालुका, श्रीरामपूर, राहाता, पाथर्डी, पारनेर, शेवगाव व संगमनेर या तालुक्यात वादळासह अवकाळी पाऊस कोसळला आहे. पारनेर तालुक्यातील टाकळी ढोकेश्वर येथे शाळेच्या मैदानात वीज पडून क्रिकेट खेळत असलेल्या गोकूळ सुरेश वाघ (वय २३, कर्जुले हर्या पारनेर) या युवकाचा मृत्यू झाला. तर दोन युवक जखमी झाले. तर संगमनेर तालुक्यातील आश्वी खुर्द येथे वादळामुळे वीजेचा खांब अंगावर पडून सुगंधा बबन बारस्कर (वय ४७) व सुभाष बबन बारस्कर (वय ३०) हे जखमी झाले होते. त्यांच्या हॉस्पिटलमध्ये उपचारादरम्यान गुरुवारी रात्री मृत्यू झाला. तर राहाता तालुक्यातील बाभळेश्वर, पुणतांबा, अस्तगाव, चोळकेवाडी, लोहगाव, वाकडी या गावांमधील ४८ घरांचे नुकसान झाले. तर दहा शेतकऱ्यांच्या डाळींब बागांचे नुकसान झाले असल्याचा प्राथमिक अहवाल राहाता तहसीलदारांनी जिल्हाधिकाऱ्यांना दिला आहे. या तालुक्यातील बाभळेश्वर येथे ५० मिलीमीटर पाऊस झाल्याने शेतातून पाणी वाहत होते. शेवगाव तालुक्यातील ताजनापूर गावात घराची भिंत अंगावर पडून तिघे जण जखमी झाले. श्रीरामपूर तालुक्यातील लाडगाव येथे वीज पडून गाडीचा मृत्यू झाला. तर पारनेरमधील ढोकी येथे वीज पडून पाच मेंढ्याचा मृत्यू झाला आहे.
नुकसानीचे पंचनामे महसूल व कृषी विभागाने सुरू केले आहे. त्यात काही तालुक्यांचे प्राथमिक अहवाल जिल्हाधिकारी कार्यालयाला प्राप्त झाले आहे. उर्वरित तालुक्यांचे अहवाल प्राप्त झालेले नाहीत. मयत व जखमी झालेल्या व्यक्तींच्या कुटुंबांना सरकारी मदत दिली जाणार आहे.