म. टा. प्रतिनिधी, नगर आंतरराष्ट्रीयस्तरावर मॅटवरील कुस्ती प्रसिद्ध असली तरी ग्रामीण भागात अजूनही मातीवरच्या कुस्तीचे प्रेम कायम आहे. नगर तालुक्यातील नेप्ती येथे ग्रामदैवत बिरोबा महाराज यात्रेनिमित्तच्या कुस्ती हगाम्यात राज्यभरातून आलेल्या कुस्तीपटूंनी उत्कृष्ट खेळाचे प्रदर्शन करीत कुस्तीप्रेमींना मंत्रमुग्ध केले. कस लावून कौशल्याने प्रतिस्पर्ध्याला चितपट करणाऱ्या मल्लांवर रोख बक्षिसांचा वर्षाव या वेळी कुस्तीप्रेमींनी केला. महिला कुस्तीपटूंनीही या हगाम्यात कौशल्य प्रदर्शन केले. श्री बिरोबा महाराज यात्रा उत्सवानिमित्त विविध धार्मिक व सांस्कृतिक कार्यक्रम झाले. युवकांनी प्रवरासंगम येथून आणलेल्या गंगाजल कावडीची मिरवणूक काढण्यात आली. श्री बिरोबा महाराजांच्या मूर्तीस अभिषेक व रात्री छबिना मिरवणूक झाली. यात्रेच्या दुसऱ्या दिवशी कुस्ती हगामा रंगला. मनोज फुले, शिवाजी गाढवे, अक्षय पवार, सुभाष गाढवे यांच्या कुस्त्या रंगल्या. या हगाम्यात ५०० रुपयांपासून ५५ हजार रुपयांपर्यंत बक्षिसाच्या कुस्त्या लावण्यात आल्या. पंच म्हणून वस्ताद बाबासाहेब पवार, शांताराम साळवे, गोरख इंगोले, दादू चौघुले, बंडू जपकर, दादाभाऊ होळकर यांनी काम पाहिले. मानाची कुस्ती उपमहाराष्ट्र केसरी योगेश पवार (नेप्ती) विरुद्ध पुणे केसरी ऋषीकेश लांडे (नगर) यांच्यात झाली. या हगाम्यासाठी माजी जिल्हा परिषद सदस्य अरुण होळकर, यांच्यासह विठ्ठल जपकर, सरपंच सुधाकर कदम, उपसरपंच शिवाजी होळकर, सुभाष जपकर, रामदास फुले, रघुनाथ होळकर, भास्कर जपकर, अशोक वाघ, राहुल गवारे, संतोष चौरे, राजेंद्र होळकर, गोरख फुले आदींनी परिश्रम घेतले.
नेप्तीत रंगला कुस्त्यांचा थरार
म टा प्रतिनिधी, नगरआंतरराष्ट्रीयस्तरावर मॅटवरील कुस्ती प्रसिद्ध असली तरी ग्रामीण भागात अजूनही मातीवरच्या कुस्तीचे प्रेम कायम आहे...
MT 16 May 2019, 4:00 am