महिला पोलिसांसाठी ‘टॉयलेट व्हॅन’

म. टा. प्रतिनिधी, नगर

बंदोबस्ताच्या ठिकाणी शौचालयाची व्यवस्था नसल्यास पोलिस कर्मचाऱ्यांची कुचंबणा होते. त्यात महिला पोलिस कर्मचाऱ्यांना मोठी अडचण सहन करावी लागते. बंदोबस्ताच्या वेळी गर्दी असल्याने दुसऱ्या ठिकाणी जाता येत नाही. त्यावर उपाय म्हणून सुसज्ज अशी पोलिस टॉयलेट व्हॅन तयार करण्यात आली आहे. ही व्हॅन बंदोबस्ताच्या ठिकाणी फिरती असणार आहे. महिला पोलिस कर्मचाऱ्यांसाठी ही एक दिलासादायक बाब आहे.

जिल्ह्यात शिर्डी, शनिशिंगणापूर येथे पोलिसांचा नियमित बंदोबस्त असतो. या ठिकाणी शौचालये असले तरी तेथे भाविकांमुळे गर्दी होते. त्यामुळे ते पोलिसांना वापरण्यासाठी मिळत नाही. ग्रामीण भागात यात्रा, उत्सव काळात बंदोबस्त असतो. गावांमध्ये सार्वजनिक शौचालये नसतात. नेत्यांच्या सभेसाठी पोलिस बंदोबस्त तैनात केला जातो. परंतु सभेजवळ शौचालयाची कोणतीही व्यवस्था नसते. ग्रामीण भागातील पोलिस ठाण्यांत कमी महिला कर्मचारी असल्याने मुख्यालयातून पोलिस बंदोबस्त पुरावला जातो. जिल्हा क्षेत्रफळाने मोठ्या असल्याने लांबपर्यंत प्रवास या कर्मचाऱ्यांना करावा लागतो. त्यात दिवसभर पोलिस बंदोबस्त असला तरी पोलिस कर्मचाऱ्यांसाठी मात्र शौचालयाची व्यवस्था नसते. त्यावर उपाय म्हणून पोलिस अधीक्षकांना रंजनकुमार शर्मा यांच्या संकल्पनेतून एक टॉयलेट व्हॅन तयार करण्यात आली आहे.

पोलिस व्हॅनचे रूपांतर

पोलिस व्हॅनचा उपयोग करून टॉयलेट व्हॅन तयार करण्यात आली आहे. पुणे येथूनच टॉयलेट व्हॅन तयार करण्यात आली आहे. या व्हॅनमध्ये पुरुष व महिला पोलिस कर्मचारी यांच्यासाठी सहा फायबरचे टॉयलेट व एक वॉशबेसिन तयार करण्यात आले आहे. व्हॅनच्या प्लास्टिकच्या पाण्याच्या टाकीची ही व्यवस्था करण्यात आली आहे. एक हजार लिटर पाण्याची ही टाकी असल्याने दिवसभर ही पाणी पुरेल, अशी व्यवस्था ही करण्यात आली आहे. शौचालय स्वच्छ राहण्यासाठी एक स्वच्छता कर्मचारीही कायमस्वरूपी या व्हॅनबरोबर असणार आहे.

यात्रांच्या काळात उपयोगी

शिर्डी, शनिशिंगणापूर या ठिकाणच्या बंदोबस्ताबरोबर गावागावांमधील मोठ्या यात्रा, एखाद्या गुन्हा घडल्यानंतर पोलिसांच्या रात्रंदिवस बंदोबस्त असते. शहरातील गणेशोत्सव मिरवणूक, मोहरम मिरवणुकीसाठी ही रात्रंदिवस बंदोबस्त असते. त्यावेळी शौचालयाअभावी महिला कर्मचाऱ्यांची कुचंबणा होते. अशा ठिकाणी ही व्हॅन पोलिस कर्मचाऱ्यांसाठी उपयोगी ठरणार आहे.