तरुणीचे नग्नवस्थेतील फोटो काढून अत्याचार

म. टा. प्रतिनिधी, नगर

प्रेमप्रकरणातून शारीरिक संबंध निर्माण झाल्यानंतर त्याचे फोटो काढून फोटो व्हायरल करण्याची धमकी देऊन महाविद्यालयातीन विद्यार्थिनीवर अत्याचार केल्याप्रकरणी एकाविरुद्ध बलात्काराचा गुन्हा नोंदविण्यात आला आहे. महाविद्यालयात शिक्षण घेणाऱ्या गोवर्धन गोरख पालवे (रा. केडगाव, नगर) असे आरोपीचे नाव आहे. पीडित विद्यार्थिनी व पालवे हे दोघे एकाच महाविद्यालयात शिक्षण घेत आहेत. गेल्या आठ महिन्यांपासून दोघांची मैत्री होती. त्यातून लग्नाचे आमिष दाखवून आरोपीने मुलीच्या घरी जाऊन, लॉजवरून तिच्याशी शारीरिक संबंध प्रस्थापित केले. त्या काळात आरोपीने दोघांच्या शारीरिक संबंधाचे फोटो काढले होते. दरम्यान, आरोपीने लग्न करण्यास नकार दिल्यानंतर संबंध ठेवण्यास तरुणीने नकार दिला होता. परंतु आरोपीने फोटो व्हायरल करण्याची धमकी देऊन अत्याचार केला. त्यानंतर रविवारी तरुणीच्या फिर्यादीवरून आरोपीविरुद्ध गुन्हा नोंदविण्यात आला.

बस थांबली; दागिने चोरीला
एसटी बस ढाब्यावर जेवणासाठी थांबली असता अज्ञात व्यक्तीने एका प्रवाशाची बॅग उघडून त्यातील दीड लाख रुपये किंमतीचे सोन्याचे दागिने व २५ हजार रुपयांची रक्कम लंपास केली. नगर-पुणे महामार्गावरील धनश्री धाबा येथे हा प्रकार घडला. या प्रकरणी सुपा पोलिस स्टेशनला चोरीचा गुन्हा नोंदविण्यात आला आहे. बीड जिल्ह्यातील पाटोदा तालुक्यातील पाचग्री येथील भीमराव गणपत औटी हे पत्नीसह पुणे-बीड एसटी बसने बीडला निघाले होते. सुपा गावाजवळील ढाब्यावर चालकाने जेवणासाठी बस थांबविली होती. सुमारे अर्धातास बस थांबली होती. त्यावेळी औटी व त्यांची पत्नी हे जेवणासाठी बसमधून खाली उतरले होते. औटी यांनी घरी गेल्यानंतर बॅगा उघडून बघितली असता बॅगमधील दागिने व २५ हजार रुपये लंपास झाल्याचे आढळले. त्यांनी सुपा पोलिस स्टेशनला गुन्हा नोंदविला आहे.