पतसंस्थेत दोन कोटींचा अपहार

म. टा. प्रतिनिधी, नगर

नेवासा तालुक्यातील सोनई येथील श्री व्यंकटेश ग्रामीण बिगरशेती सहकारी पतसंस्थेत १ कोटी ९३ लाखांचा अपहार झाला आहे. या पतसंस्थेच्या सोनई शाखेत शाखा व्यवस्थापक, कॅशियर, लिपिक या तिघांनी संगनमत करून बोगस कर्ज, सोनेतारण कर्ज काढून हा अपहार केल्याचे उघडकीस आले आहे. या प्रकरणी सोनई पोलिस स्टेशनला गुन्हा नोंदविण्यात आला आहे.

या पतसंस्थेचे लेखापरिक्षण करणाऱ्या सोमाणी अॅँड असोसिएटच्या सुविद्या सोमाणी यांच्या फिर्यादीवरून पतसंस्थेचा शाखा व्यवस्थापक श्यामसुंदर शंकर खामकर, कॅशियर गणेश अंबादास तांदळे, लिपिक गणेश हरिभाऊ गोरे (रा. सोनई) असे आरोपींची नावे आहेत. सोमाणी यांनी पतसंस्थेचे १ एप्रिल २०१६ ते ३१ मार्च २०१७ या आर्थिक वर्षाचे लेखापरिक्षण केले होते. त्यात पतसंस्थेचे व्यवस्थापक व इतर कर्मचाऱ्यांनी मिळवून आर्थिक गैरव्यवहार उघडकीस आला होता. बेकायदेशीररित्या बोगस सही शिक्यांचा वापर करून संस्थेच्या रक्कमेची बेकायदेशीरपणे उचल केली. त्यात बोगस सोने तारण कर्ज, बोगस मुदत ठेव तारण कर्ज दाखवून १ कोटी ९३ लाख ७ हजार गैरव्यवहार केल्याचे उघडकीस आले होते. याबाबत अहवाल लेखापरिक्षण करणाऱ्या संस्थेने सहायक निबंधकांना दिला होता. त्यानंतर सोनई पोलिस स्टेशनला आरोपींविरुद्ध गुन्हा दाखल करण्यात आला आहे. या पतसंस्थेत गैरव्यवहार झाल्यानंतर ठेवीदारांच्या ठेवीही अडचणीत आलेल्या आहेत.