दोन दिवस आधीच राजकीय भूकंप
वॉर्ड रचनेची उत्सुकताही संपली; 'लढण्याची मैदाने' होऊ लागली निश्चित
म. टा. प्रतिनिधी, नगर
महापालिकेतील राखीव व महिला राखीव जागांच्या सोडतीच्या रुपाने अपेक्षित मिनी राजकीय भूकंपाचे स्वरूप शुक्रवारी चक्क मोठ्या राजकीय भूकंपात झाले. प्रशासनाने वॉर्ड नकाशे व त्या वॉर्डाच्या सीमारेषा असलेली ठिकाणे जाहीर केल्याने यंदाच्या निवडणुकीत नेमकी वॉर्ड रचना कशी असेल, याचे चित्र जवळपास स्पष्ट झाले. परिणामी येत्या सोमवारी (२७ ऑगस्ट) जाहीर होणाऱ्या प्रारुप प्रभाग रचनेची उत्सुकता जवळपास संपुष्टात आली आहे. शुक्रवारीच वॉर्ड रचनेचे स्वरूप समजल्याने इच्छुकांकडून लढण्याची मैदानेही निश्चित झाली आहेत. काहींनी तर लगेच व्हॉटसअॅप ग्रुपवर आपल्या नव्या वॉर्डांचा क्रमांक टाकून तेथील 'एकमेव आशास्थान' आपणच असल्याचे दावेही सुरू केले आहेत.
मनपा निवडणुकीच्या प्रक्रियेत ६८ नगरसेवकांपैकी राखीव २८ जागांसह महिलांसाठीच्या ३४ जागांची सोडत काढण्याची प्रक्रिया शुक्रवारी झाली. मात्र, ती करण्याआधी नागरिकांच्या माहितीसाठी वॉर्ड रचना नकाशे व त्यातील प्रमुख भागांची माहिती प्रशासनाद्वारे जाहीर फलकाद्वारे लावली गेल्याने प्रत्यक्ष आरक्षण सोडत समजून घेण्याऐवजी जाहीर झालेली वॉर्ड रचना व नकाशे पाहण्यासच झुंबड उडाली. अनेकांनी मोबाइल फोटोद्वारे ही वॉर्ड रचना कॅमेराबद्ध करून आपल्या नेत्यांना व कार्यकर्त्यांना व्हॉट्सअॅपद्वारे पाठवल्याने अवघ्या काही मिनिटांत ती शहरभर पसरली. त्यामुळे या रचनेबाबत दोन दिवसांनी मिळणारी माहिती आधीच मिळाल्याने राजकीय क्षेत्रात खुशीचे वातावरण होते.
राखीव जागांच्या सोडतीद्वारे कोणते वॉर्ड वा कोणत्या वॉर्डातील कोणत्या जागा राखीव होणार, हे यातून स्पष्ट होणार असल्याने मनपा राजकारणातील हा मिनी भूकंप मानला जात होता. पण या सोडतीबरोबरच वॉर्ड रचना उत्सुकतेचा मुख्य राजकीय भूकंपही शुक्रवारीच झाल्याने कोणते जुने वॉर्ड कोठे जोडले गेले व कोणत्या वॉर्डात कोणते नवे भाग समाविष्ट झाले हे यातून स्पष्ट झाले. त्यामुळे आता येत्या सोमवारी (२७ ऑगस्ट) प्रारुप वॉर्ड रचनेत शहरातील गल्लीबोळ व रस्तेनिहाय प्रारुप वॉर्डरचना राजपत्रात जाहीर होणार असली, तरी तिची फारशी उत्सुकता राजकीय क्षेत्राला राहिलेली नाही. अर्थात या वॉर्ड रचनेचीही माहिती घेण्यास प्राधान्य असणार आहे. कारण कोणती गल्ली आपल्या वॉर्डात आली आहे व तेथे आपल्याला मानणारे कोण आहेत, याची माहिती यातून स्पष्ट होणार आहे. शिवाय एखादी गल्ली वा रस्ता चुकून दुसऱ्या वॉर्डात गेला, तर त्याचीही माहिती घेऊन त्यावर हरकती व सूचना नोंदवण्याचे काम करावे लागणार आहे. त्यामुळे सोमवारची विस्तृत स्वरुपातील प्रारुप वॉर्डरचना घेऊन ठेवण्यास राजकीय नेतेमंडळी व कार्यकर्त्यांची लगबग असणार आहे. प्रत्यक्ष वॉर्ड रचनेची या दिवसाची अपेक्षित उत्सुकता मात्र दोन दिवस आधीच संपुष्टात आली आहे.
जोरदार फोनाफोनी
मनपाच्या राखीव जागा सोडतीच्या प्रक्रियेस सुरुवातीला नगरसेवक वा नेतेमंडळी उपस्थित नव्हती. पण या प्रक्रियेदरम्यान वॉर्डरचना नकाशे व विभागांची माहिती जाहीर झाल्याने मनपाकडे राजकीय नेतेमंडळी व त्यांच्या समर्थकांनी धाव घेतली. वॉर्ड रचनेच्या फोटोंद्वारे काढलेली कागदी प्रिंट टेबलावर मधोमध ठेवून पदाधिकाऱ्यांच्या दालनांतील कोंडाळ्यांमध्ये चर्चा रंगली होती. कोणाला कोणता वॉर्ड सोयीस्कर आहे, कोणाला कोठे दगाफटका होणार आहे, कोणाचा खर्च वाढणार आहे, कोणाला कोणाशी जमवून घ्यावे लागणार आहे, याच्या रंगतदार चर्चा सुरू होत्या.
सोशल मीडियावर प्रचार सुरू
वॉर्डरचना स्पष्ट झाल्याने विद्यमान नगरसेवकांनी आपली डाळ कोठे शिजू शकेल, याचा अंदाज बांधून लगेच त्या वॉर्डातील 'एकमेव आशास्थान' अशा आशयाचे स्वतःचे वर्णन करून व्हॉट्सअॅप व फेसबुकसारख्या सोशल मीडियावर प्रचारही सुरू केला आहे. बहुतांश विद्यमान नगरसेवक यात आघाडीवर आहेत. काही नव्या इच्छुकांनीही अशा पद्धतीने प्रचार करण्याचे नियोजन केले असून, त्यांच्याही व्हॉट्सपअॅप जाहिराती सायंकाळपासून विविध ग्रुपमधून झळकू लागल्या.
वॉर्ड रचनेची उत्सुकताही संपली; 'लढण्याची मैदाने' होऊ लागली निश्चित
म. टा. प्रतिनिधी, नगर
महापालिकेतील राखीव व महिला राखीव जागांच्या सोडतीच्या रुपाने अपेक्षित मिनी राजकीय भूकंपाचे स्वरूप शुक्रवारी चक्क मोठ्या राजकीय भूकंपात झाले. प्रशासनाने वॉर्ड नकाशे व त्या वॉर्डाच्या सीमारेषा असलेली ठिकाणे जाहीर केल्याने यंदाच्या निवडणुकीत नेमकी वॉर्ड रचना कशी असेल, याचे चित्र जवळपास स्पष्ट झाले. परिणामी येत्या सोमवारी (२७ ऑगस्ट) जाहीर होणाऱ्या प्रारुप प्रभाग रचनेची उत्सुकता जवळपास संपुष्टात आली आहे. शुक्रवारीच वॉर्ड रचनेचे स्वरूप समजल्याने इच्छुकांकडून लढण्याची मैदानेही निश्चित झाली आहेत. काहींनी तर लगेच व्हॉटसअॅप ग्रुपवर आपल्या नव्या वॉर्डांचा क्रमांक टाकून तेथील 'एकमेव आशास्थान' आपणच असल्याचे दावेही सुरू केले आहेत.
मनपा निवडणुकीच्या प्रक्रियेत ६८ नगरसेवकांपैकी राखीव २८ जागांसह महिलांसाठीच्या ३४ जागांची सोडत काढण्याची प्रक्रिया शुक्रवारी झाली. मात्र, ती करण्याआधी नागरिकांच्या माहितीसाठी वॉर्ड रचना नकाशे व त्यातील प्रमुख भागांची माहिती प्रशासनाद्वारे जाहीर फलकाद्वारे लावली गेल्याने प्रत्यक्ष आरक्षण सोडत समजून घेण्याऐवजी जाहीर झालेली वॉर्ड रचना व नकाशे पाहण्यासच झुंबड उडाली. अनेकांनी मोबाइल फोटोद्वारे ही वॉर्ड रचना कॅमेराबद्ध करून आपल्या नेत्यांना व कार्यकर्त्यांना व्हॉट्सअॅपद्वारे पाठवल्याने अवघ्या काही मिनिटांत ती शहरभर पसरली. त्यामुळे या रचनेबाबत दोन दिवसांनी मिळणारी माहिती आधीच मिळाल्याने राजकीय क्षेत्रात खुशीचे वातावरण होते.
राखीव जागांच्या सोडतीद्वारे कोणते वॉर्ड वा कोणत्या वॉर्डातील कोणत्या जागा राखीव होणार, हे यातून स्पष्ट होणार असल्याने मनपा राजकारणातील हा मिनी भूकंप मानला जात होता. पण या सोडतीबरोबरच वॉर्ड रचना उत्सुकतेचा मुख्य राजकीय भूकंपही शुक्रवारीच झाल्याने कोणते जुने वॉर्ड कोठे जोडले गेले व कोणत्या वॉर्डात कोणते नवे भाग समाविष्ट झाले हे यातून स्पष्ट झाले. त्यामुळे आता येत्या सोमवारी (२७ ऑगस्ट) प्रारुप वॉर्ड रचनेत शहरातील गल्लीबोळ व रस्तेनिहाय प्रारुप वॉर्डरचना राजपत्रात जाहीर होणार असली, तरी तिची फारशी उत्सुकता राजकीय क्षेत्राला राहिलेली नाही. अर्थात या वॉर्ड रचनेचीही माहिती घेण्यास प्राधान्य असणार आहे. कारण कोणती गल्ली आपल्या वॉर्डात आली आहे व तेथे आपल्याला मानणारे कोण आहेत, याची माहिती यातून स्पष्ट होणार आहे. शिवाय एखादी गल्ली वा रस्ता चुकून दुसऱ्या वॉर्डात गेला, तर त्याचीही माहिती घेऊन त्यावर हरकती व सूचना नोंदवण्याचे काम करावे लागणार आहे. त्यामुळे सोमवारची विस्तृत स्वरुपातील प्रारुप वॉर्डरचना घेऊन ठेवण्यास राजकीय नेतेमंडळी व कार्यकर्त्यांची लगबग असणार आहे. प्रत्यक्ष वॉर्ड रचनेची या दिवसाची अपेक्षित उत्सुकता मात्र दोन दिवस आधीच संपुष्टात आली आहे.
जोरदार फोनाफोनी
मनपाच्या राखीव जागा सोडतीच्या प्रक्रियेस सुरुवातीला नगरसेवक वा नेतेमंडळी उपस्थित नव्हती. पण या प्रक्रियेदरम्यान वॉर्डरचना नकाशे व विभागांची माहिती जाहीर झाल्याने मनपाकडे राजकीय नेतेमंडळी व त्यांच्या समर्थकांनी धाव घेतली. वॉर्ड रचनेच्या फोटोंद्वारे काढलेली कागदी प्रिंट टेबलावर मधोमध ठेवून पदाधिकाऱ्यांच्या दालनांतील कोंडाळ्यांमध्ये चर्चा रंगली होती. कोणाला कोणता वॉर्ड सोयीस्कर आहे, कोणाला कोठे दगाफटका होणार आहे, कोणाचा खर्च वाढणार आहे, कोणाला कोणाशी जमवून घ्यावे लागणार आहे, याच्या रंगतदार चर्चा सुरू होत्या.
सोशल मीडियावर प्रचार सुरू
वॉर्डरचना स्पष्ट झाल्याने विद्यमान नगरसेवकांनी आपली डाळ कोठे शिजू शकेल, याचा अंदाज बांधून लगेच त्या वॉर्डातील 'एकमेव आशास्थान' अशा आशयाचे स्वतःचे वर्णन करून व्हॉट्सअॅप व फेसबुकसारख्या सोशल मीडियावर प्रचारही सुरू केला आहे. बहुतांश विद्यमान नगरसेवक यात आघाडीवर आहेत. काही नव्या इच्छुकांनीही अशा पद्धतीने प्रचार करण्याचे नियोजन केले असून, त्यांच्याही व्हॉट्सपअॅप जाहिराती सायंकाळपासून विविध ग्रुपमधून झळकू लागल्या.