म. टा. प्रतिनिधी, नगर
जिल्हाधिकारी कार्यालयात शनिवारी झालेल्या जिल्हास्तरीय चारा छावणी समितीच्या बैठकीत दोन चारा छावण्या सुरू करण्यास मंजुरी देण्यात आली आहे. या बैठकीमध्ये मंजुरीसाठी एकूण सहा संस्थांचे प्रस्ताव ठेवण्यात आले होते. त्यापैकी भाळवणी (ता. पारनेर) येथील संकल्प युवा प्रतिष्ठान व करंजी (ता. पाथर्डी) येथील विविध कार्यकारी सेवा सहकारी सोसायटी या दोन संस्थांचे प्रस्ताव मंजूर करण्यात आले आहेत.
चारा छावणी सुरू करण्यासाठी जिल्ह्यातील दहा तालुक्यांतून एकूण ५३४ प्रस्ताव प्राप्त झाले आहेत. या प्रस्तावांपैकी परिपूर्ण असणाऱ्या प्रस्तावांना मंजुरी देण्याची प्रक्रिया सुरू झाली आहे. राज्य सरकारने जिल्ह्यातील तब्बल एक हजार ४२१ गावे दुष्काळी घोषित केली. दुष्काळी परिस्थितीत जिल्ह्यात चाराटंचाई निर्माण झाली असून, चारा छावण्या सुरू करण्याची मागणी जोर धरत आहे. त्यातच राज्य सरकारने २५ जानेवारी रोजी चारा छावण्या सुरू करण्यास मंजुरी दिली आहे. त्यानुसार चारा छावणी सुरू करण्यासाठी विहित नमुन्यातील प्रस्ताव संबंधित तहसीलदारांकडे दाखल होत आहेत. त्यानुसार या प्रस्तावांची छाननी करून परिपूर्ण प्रस्ताव तहसीलदारांकडून उपविभागीय अधिकाऱ्यांमार्फत जिल्हाधिकारी यांच्याकडे मंजुरीसाठी पाठवण्यात येत असून शनिवारपर्यंत असे एकूण सहा प्रस्ताव प्राप्त झाले होते. हे सर्व प्रस्ताव जिल्हास्तरीय चारा छावणी समितीच्या बैठकीमध्ये मंजुरीसाठी ठेवण्यात आले होते. त्यानंतर अटी व शर्थीचे पालन करणारे व परिपूर्ण असणाऱ्या दोन प्रस्तावांना मंजुरी देण्यात आली आहे. त्यामुळे भाळवणी व करंजी येथे चारा छावणी सुरू करण्याचा मार्ग मोकळा झाला आहे.
.....