म. टा. प्रतिनिधी, नगर
रात्रीच्या वेळी वाहनचालकांना अडवून शस्त्राचा धाक दाखवून लुटणाऱ्या टोळीतील दोघा आरोपींना स्थानिक गुन्हे शाखेच्या पथकाने जेरबंद केले आहे. या टोळीने दोन दिवसांपूर्वी शहर बायपासवर टेम्पोचालकाला लुटले होते. या टोळीतील इतर दोघांचा पोलिस शोध घेत आहे.
रविवारी पहाटे शहर बायपासवर एका टोळीने टेम्पोचालकाला अडवून त्यांच्याकडील १७ हजार रुपयांची रक्कम हिसकावून घेतली होती. तर सोमवारी रात्री एका कंपनीच्या कामगाराला तिघांना मारहाण करून लुटले होते. या प्रकरणी गुन्हे नोंदविण्यात आल्यानंतर हे गुन्हे सागर भांड प्रमुख असलेल्या टोळीने केल्याचे उघडकीस आल्यानंतर या टोळीचा एमआयडीसी पोलिस व स्थानिक गुन्हे शाखेच्या पथकाने शोध सुरू केला होता. या टोळीतील दीपक बेरड (रा. दरेवाडी, नगर) व इतर साथीदार हे चांदणी चौक येथे येणार असल्याची माहिती स्थानिक गुन्हे शाखेला मिळाली होती. त्यानुसार पोलिस उपनिरीक्षक सुधीर पाटील, पोलिस कर्मचारी फकीर शेख, दत्ता हिंगडे, संदीप घोडके, संदीप पवार, भागीनाथ पंचमुख, सुनील चव्हाण यांच्य़ा पथकाने सापळा रचून दीपक बेरड व रामा अंकुश इंगळे (वय २०, निंबोडी, नगर) या दोघांनी ताब्यात घेतले. सागर अण्णासाहेब भांड, इरफान मुन्ना पठाण उर्फ असिफ शेख (रा. नगर) यांच्याबरोबर मिळून दोन्ही गुन्हे केल्याची कबुली दोन्ही आरोपींनी दिली आहे.
सागर भांडवर बक्षीस
सागर भांडविरुद्ध वाहनचालकांना लुटल्य़ाचे अनेक गुन्हे आहेत. पुणे जिल्ह्यातील लोणी कंद, शिरुर, नगर या परिसरात गुन्हे करण्यासाठी भांड हा फिरत असतो. त्याला जेरबंद करण्यासाठी त्याची माहिती देणाऱ्याला एमआयडीसी पोलिसांनी बक्षीस जाहीर केले आहे. भांडची माहिती देणाऱ्याला दहा रुपयांची रोख बक्षीस देण्यात येणार असून, माहिती देणाऱ्याचे नाव गुप्त ठेवले जाणार असल्याची माहिती एमआयडीसीचे सहायक पोलिस निरीक्षक विनोद चव्हाण यांनी दिली. यासंबंधीत माहिती असल्यास सहायक पोलिस निरीक्षक चव्हाण (९३७०९०३१५१) यांच्याशी संपर्क साधावा, असे आवाहन करण्यात आले आहे.