दोन लाख विद्यार्थी ‘आधारकार्ड’विना

म. टा. प्रतिनिधी, नगर

शालेय विद्यार्थी व अंगणवाडीतील बालकांच्या जास्तीत जास्त आधार नोंदणीसाठी प्रयत्न सुरू आहे. नोंदमीचे विशेष मोहिम राबविण्यात येऊन तब्बल दोन लाख मुलांची आधार नोंदणी अद्याप बाकी आहे. शाळा व अंगणवाडीमध्ये जाऊन या मुलांची आधार नोंदणीसाठी करण्यासाठी आणखी एक महिन्याची मुदतवाढ देण्यात आली आहे. आता सप्टेंबर अखेरपर्यंत मुलांची आधार नोंदणी पूर्ण करायची आहे.

शालेय विद्यार्थी व अंगणवाडीतील बालके यांच्या आधार नोंदणीबाबतची आढावा बैठक जिल्हाधिकारी अनिल कवडे यांनी घेतली. जिल्हा परिषदेचे मुख्य कार्यकारी अधिकारी डॉ. रवींद्र बिनवडे, आधारचे समन्वय अधिकारी अरुण आनंदकर, उपविभागीय अधिकारी वामन कदम, तहसीलदार सुधीर पाटील यांच्यासह बालविकास प्रकल्प अधिकारी उपस्थित होते. आधार नोंदणीमध्ये जिल्हा परिषदेचे शिक्षणाधिकारी, उपमुख्य कार्यकारी अधिकारी, सर्व गट शिक्षण अधिकारी यांनी आवश्यक नियोजन करून आधार नोंदणी शंभर टक्के पूर्ण कराव्यात अशा सूचन जिल्हाधिकारी अनिल कवडे यांनी दिली. राहुरी, राहाता, श्रीरामपूर या तालुक्यात शालेय विद्यार्थी यांची आधार नोंदणी मोठ्या प्रमाणात बाकी असल्याचे बैठकीत समोर आले आहे. जिल्ह्यात ९८ टक्के आधार नोंदणी झाली आहेत. त्यात विद्यार्थी व अंगणवाडीतील बालकेचे मोठ्या प्रमाणात बाकी आहेत. जिल्ह्यात ६ ते १४ वर्ष वयोगटातील ८ लाख ८६ हजार विद्यार्थी आहेत. त्यातील १ लाख १७ हजार विद्यार्थ्यांची आधार नोंदणी बाकी आहेत. तर अंगणवाड्यांमध्ये ० ते ६ वर्षवयोगातील ३ लाख ५२ हजार बालके असून, त्यातील ८८ हजार ८८ हजार बालकांची आधार नोंदणी झालेली नाही.

सर्व आधार नोंदणी केंद्राना विद्यार्थी व बालकांच्या आधार नोंदणीला प्राथमिकता द्यावी, अशा सूचना वेळीवेळी प्रशासनाकडून देण्यात आल्या आहेत. तसेच नोंदणी न करणाऱ्या आधार नोंदणी केंद्रचालकांवर प्रशासनाने कारवाई केलेली आहे. तरी मोठ्या संख्येने आधार नोंदणी बाकी आहे. या आगस्ट महिन्यात नोंदणी पूर्ण करायची आहे. पूर्णपणे नोंदणी झाल्याने सप्टेंबरअखेर एक महिन्याची मुदत वाढविण्यात आली आहे.