दोन विद्यार्थी बंधाऱ्यात बुडाले

नगर : गोदावरी नदीवरील हिंगणी बंधाऱ्यात पोहण्यासाठी गेलेल्या चारपैकी दोन विद्यार्थ्यांचा बुडून मृत्यु झाला. शनिवारी सकाळी अकरा वाजण्याच्या सुमारास ही घटना घडली असून सार्थक किशोर सोनवणे (वय १७) व सार्थक संतोष लांडे (वय १७) अशी मृत विद्यार्थ्यांची नावे आहेत.
कोपरगाव शहरातील एका कनिष्ठ महाविद्यालयात बारावीत शिकणारे विद्यार्थी सार्थक सोनवणे, सार्थक लांडे, ऋषीकेश अंकुश आगलावे व अक्षय नामदेव चौधरी हे चौघे मित्र शनिवारी सकाळी हिंगणी बंधाऱ्यात पोहण्यासाठी गेले होते. बंधाऱ्यामध्ये उतरले असता सार्थक सोनवणे व सार्थक लांडे या दोघांचे पाय गाळामध्ये रुतल्याने त्यांचा बुडून मृत्यु झाला. सार्थक लांडे हा (माहूली, ता. गंगापूर जि. औरंगाबाद) येथील रहिवाशी असून तो कोपरगाव येथे मामाकडे शिक्षणासाठी आलेला होता. पोलिस पाटील पंडीत पवार यांनी पोलिसांना खबर दिली. त्यानुसार कोपरगाव तालुका पोलीस ठाण्यात अकस्मात मृत्यूची नोंद करण्यात आली आहे.