वराळ हत्येप्रकरणी अॅड. निकम नियुक्त

नगर:पारनेर तालुक्यातील निघोजचे माजी सरपंच संदीप वराळ हत्याकांड खटल्यात सरकारी पक्षाकडून विशेष सरकारी वकील अॅड. उज्ज्वल निकम हे बाजू मांडणार आहेत. अॅड. निकम यांचे नियुक्तीचे पत्र विधी व न्याय विभागाने काढले आहे. हा खटला नाशिक येथील मोक्का न्यायालयात चालणार आहे.
अॅड. निकम हे सध्या राज्यभर गाजलेल्या कोपर्डी खटला, पारनेरमधील लोणी मावळा येथील बलात्कार व हत्याकांड खटल्यात सरकारी पक्षाकडून बाजू मांडत आहेत. वराळ खटल्यात अॅड. निकम यांची नियुक्ती करावी, अशी मागणी विधानसभेचे विरोधी पक्षनेते राधाकृष्ण विखे यांनी मुख्यमंत्र्याकडे केली होती.
राजकीय वर्चस्वातून जानेवारी महिन्यात काँग्रेसचे पदाधिकारी संदीप वराळ यांची निघोज गावात भरदिवसा हत्या करण्यात आली होती. या गुन्ह्यातील मुख्य आरोपी व ग्रामपंचायत सदस्य प्रवीण रसाळ याला मे महिन्यात स्थानिक गुन्हे शाखेने जेरबंद केले होते. प्रवीण रसाळसह अकरा जणांना मोक्का लावण्यात
आला होता.