उज्ज्वल निकम 'कोपर्डीत' बचावाचे साक्षीदार

म.टा. प्रतिनिधी। अहमदनगर

कोपर्डी खटल्यात बचाव पक्षाचे साक्षीदार म्हणून सहा जणांची यादी आरोपीच्या वतीने गुरुवारी न्यायालयात सादर करण्यात आली आहे. विशेष म्हणजे यादीत या खटल्यात सरकारी पक्षाचे बाजू मांडत असलेले सरकारी वकील अॅड. उज्ज्वल निकम यांचे नाव आहे. यावर सरकारी पक्षाच्या वतीने अॅड. निकम शुक्रवारी म्हणणे मांडणार आहे. त्यानंतर या यादीवर न्यायालय निर्णय देणार आहे

या खटल्याची अंतिम सुनावणी सुरू असून, या गुन्ह्यातील आरोपींचे न्यायालय जबाब नोंदवून घेत आहे. गुरुवारी आरोपी संतोष भवाळ याचा जबाब नोंदविण्यात आला. त्यात बचावाचे साक्षीदार घ्यायचे असल्याची माहिती आरोपीने न्यायालयात दिली. त्यानुसार भवाळ याचे वकील अॅड. बाळासाहेब खोपडे यांनी अर्जासह बचाव पक्षाच्या वतीने साक्षीदारांची यादी न्यायालयात सादर केली. या अर्जाबरोबरच मुख्यमंत्री देवेंद्र फडणवीस यांचे भाषण असलेली एक सीडीही दाखल करण्यात आली असून, विशेष सरकारी वकील अॅड. निकम यांच्यासह रवींद्र चव्हाण, वैद्यकीय अधिकारी राजाभाऊ थोरात, एका वृत्तवाहिनीचा संपादक, नगरचे जिल्हाधिकारी अभय महाजन यांची नावे आहेत. निकम यांची या खटल्यात नेमणूक कशी झाली आहे, मंत्रालयात झालेल्या पत्रव्यवहारासंदर्भात माहिती घ्यायची आहे. त्यामुळे त्यांचे नाव साक्षीदाराच्या यादीत घेतले असल्याचे अॅड. खोपडे यांनी अर्जात म्हटले आहे. दरम्यान अॅड. उज्ज्वल निकम हे सकाळी न्यायालयात हजर होते. त्यानंतर वैयक्तिक कारणामुळे न्यायालयातून ते निघून गेले. आज, शुक्रवारी न्यायालयात हजर राहणार आहेत.