विविध उपक्रमांनी बालदिन उत्साहात

म. टा. प्रतिनिधी, नगर
‘देश की ताकत, हम सब बच्चे’ अशा दिल्या जाणाऱ्या घोषणा, आकाशामध्ये फुगे सोडण्यासोबत उत्साहाने उड्या मारणारी मुले, जिल्हा न्यायालयातील कोर्ट हॉल पाहण्यात मग्न असणारे शाळकरी विद्यार्थी, हातामध्ये विविध संदेश फलक घेऊन शहरातून निघालेली बालकांची रॅली... असे उत्साहपूर्ण वातावरणात बालदिनाच्या निमित्ताने नगरमध्ये होते.
देशाचे पहिले पंतप्रधान पंडित जवाहरलाल नेहरू यांची जयंती (१४ नोव्हेंबर) बालदिन म्हणून साजरी करण्यात येते. यानिमित्त शहरामध्ये सामाजिक संघटना, राजकीय पक्ष यांच्या वतीने लहान मुलांसाठी विविध उपक्रमांचे आयोजन करण्यात आले होते.
अहमदनगर प्रेस क्लब, स्नेहालय संचलित चाइल्ड लाइन व रोटरी क्लब ऑफ अहमदनगर सेंट्रल यांच्या संयुक्त विद्यमाने लालटाकी येथील पंडित जवाहरलाल नेहरू यांच्या पुतळ्याला अभिवादन करुन बालदिन साजरा करण्यात आला. यावेळी शहर वाहतूक शाखेचे पोलीस निरीक्षक सुनील पाटील, सहाय्यक पोलीस निरीक्षक बजरंग चौघुले, सहाय्यक पोलीस निरीक्षक विनोद चव्हाण, रेल्वेचे उपप्रबंधक नागोरे, प्रेस क्लबचे अध्यक्ष मन्सूर शेख, महेश देशपांडे, अॅड. शिवाजी कराळे, रोटरी क्लबचे अध्यक्ष धिरज मुनोत, चाइल्ड लाइनचे सहसंचालक हानिफ शेख, समन्वयक प्राची सोनावणे उपस्थित होते. कार्यक्रमाला उपस्थित मान्यवरांनी शुभेच्छा दिल्या. त्यानंतर बालकांनी हवेत फुगे सोडून बालदिन साजरा केला. बालदिनाचे औचित्य साधून शहरात प्रभात फेरीचे आयोजन करण्यात आले होते. शहरातील लालटाकी रोड येथून प्रभात फेरीस सुरुवात झाली. दिल्लीगेट, चितळेरोड, वाडिया पार्क, माळीवाडा, महात्मा गांधी रोड, सर्जेपुरा या मार्गे फेरी काढण्यात आली. सूत्रसंचालन हानिफ शेख यांनी केले तर प्राची सोनावणे यांनी उपस्थित मान्यवरांचे आभार मानले.

जिल्हा न्यायालयात उपक्रम

जिल्हा विधी सेवा प्राधिकरणच्या वतीने बाल दिनानिमित्त जिल्हा न्यायालयात बाल दिन शिबिराचे आयोजन करून विद्यार्थ्यांना शालेय साहित्य, गुलाबपुष्प व खाऊचे वाटप करण्यात आले. यावेळी विद्यार्थ्यांना कोर्ट हॉलमध्ये नेऊन त्यांना न्यायालयीन कामकाजाची माहिती देण्यात आली. जिल्हा प्रमुख व सत्र न्यायाधीश प्रकाश माळी यांनी उपस्थित विद्यार्थ्यांना मार्गदर्शन केले. कार्यक्रमाचे प्रास्ताविक विधी सेवा प्राधिकरणचे सचिव पद्माकर केस्तीकर यांनी केले. याप्रसंगी जिल्हा न्यायाधीश व्ही.डब्ल्यू. हुड, जिल्हा सरकारी वकील सतीश पाटील, बार असोसिएशनचे अध्यक्ष सुरेश ठोकळ, बाळासाहेब पवार, कावेरी वाघ, स्वाती पवार, अतुल खांदवे, मुख्याध्यापिका मंदा हांडे, अॅड. विक्रम वाडेकर, अॅड. अनुराधा येवले उपस्थित होते.

भुईकोट किल्ला येथे नेहरूंना अभिवादन

पंडित जवाहरलाल नेहरू यांची जयंती व बालदिनानिमित्त नेहरू यांच्या प्रतिमेस पुष्पहार घालत शहर जिल्हा काँग्रेसच्या वतीने बालदिन साजरा करण्यात आला. यावेळी शहर जिल्हाध्यक्ष दिप चव्हाण, बाळासाहेब भुजबळ, बाळासाहेब भंडारी, निजाम जहागीरदार, सुभाष त्रिमुखे, फिरोज खान, सुनीता बागडे, हनीफ शेख, सविता मोरे, ज्ञानदेव भिंगारदिवे, रिजवान शेख, शकील शेख, मोहसीन शेख, राजेश बाठिया उपस्थित होते.

बालकाच्या हस्ते द्वैमासिकाचे प्रकाशन

नगरचा प्रसिद्ध बालचित्रकार आरुष गिरमकर याने बालकांसाठीच्या माधव राजगुरू संपादित मुलांचा हिरो ‘झंप्या’ या द्वैमासिकाचे प्रकाशन बाल कवयित्री ऋचा सिनकर हिच्या समवेत केले. पुण्यातील या कार्यक्रमास बालसाहित्यिक डॉ. न. म. जोशी यांच्यासह पुणे मसापचे कार्याध्यक्ष प्रा. मिलिंद जोशी, डॉ. संगीता बर्वे, अरुण खोरे, प्रा. विश्वास वसेकर, डॉ. दिलीप गरूड यांच्यासह बालसाहित्य क्षेत्रातील कवी-लेखक उपस्थित होते. ‘गोट्या’ व ‘फास्टर फेणे’ यांच्यानंतर ‘झंप्या’ या पात्राची मांडणी या द्वैमासिकातून केली गेली आहे. यावेळी प्रा. जोशी म्हणाले, ‘पुस्तकांमुळे ज्ञानाची ऊर्जा मिळते, त्यामुळे मुलांनी पुस्तकांचे पंख लावून ज्ञानरूपी आकाशात भरारी घेतली पाहिजे. उद्धव कानडे यांनी सूत्रसंचालन, तर कविता मेहेंदळे यांनी आभार मानले.