प्रस्तावित मतदान कार्यक्रम तयार; २६ डिसेंबरला मतमोजणीचे नियोजन
म. टा. प्रतिनधी, नगर
जिल्हा नियोजन समितीमधील रिक्त असणाऱ्या पाच सदस्यांच्या निवडीसाठी डिसेंबर महिन्यात निवडणूक होणार आहे. जिल्हा प्रशासनाने प्रस्तावित निवडणूक कार्यक्रम तयार केला असून तो अंतिम मंजुरीसाठी राज्य सरकारच्या नियोजन विभागाकडे पाठविला आहे. दरम्यान, या निवडणुकीसाठी अंतिम मतदारयादी तयार झाली असून त्यामध्ये ३६९ मतदारांचा समावेश आहे.
जिल्ह्यातील विकास कामांचे नियोजन करण्यासाठी असणाऱ्या नियोजन समितीमध्ये सध्या ग्रामीण निर्वाचन क्षेत्राची म्हणजे जिल्हा परिषदेची एक, महापालिकेच्या तीन व लहान नागरी क्षेत्राची नगरपालिकेची एक, अशा एकूण पाच जागा रिक्त आहे. यापैकी लहान नागरी क्षेत्राची जागा खुल्या प्रवर्गासाठी, ग्रामीण निर्वाचन क्षेत्राची जागा ओबीसी प्रवर्गासाठी राखीव आहे. तर, मोठ्या नागरी क्षेत्राच्या तीन जागांपैकी एक जागा खुल्या प्रवर्गासाठी, एक जागा सर्वसाधारण महिला व एक जागा ओबीसी प्रवर्गासाठी राखीव आहे. या निवडणुकीची अंतिम मतदारयादी तयार झाली असून त्यानुसार ग्रामीण क्षेत्रासाठी ७२, लहान नागरी क्षेत्रासाठी २२९ व मोठ्या नागरी क्षेत्रासाठी ६८ मतदार आहेत.
नियोजन समितीच्या रिक्त जागांसाठीच्या निवडणुकीचा प्रस्तावित कार्यक्रम जिल्हा प्रशासनाने तयार केला आहे. त्यानुसार उमेदवारी अर्ज दाखल करण्यासाठी २ ते ५ डिसेंबर मुदत देण्यात आली आहे. तर, उमेदवारी अर्जाची छाननी सहा डिसेंबरला करण्यात येणार असून त्यानंतर वैध यादी सात डिसेंबरला प्रसिद्ध करण्यात येईल. वैध यादी प्रसिद्ध झाल्यानंतर त्यावर अपील करण्यासाठी नऊ डिसेंबरपर्यंत मुदत असून अपिल निकाली काढल्यानंतर तयार केली जाणारी यादी १३ डिसेंबरला प्रसिद्ध होईल. उमेदवारी अर्ज मागे घेण्यासाठी १४ डिसेंबरपर्यंत मुदत देण्यात आली असून निवडणुकीच्या रिंगणात असलेल्या उमेदवारांची अंतिम यादी १७ डिसेंबरला प्रसिद्ध होणार आहे. तर, या निवडणुकीसाठी २४ डिसेंबरला मतदान होणार असून मतमोजणी २६ डिसेंबरला घेण्यात येईल. जिल्हा प्रशासनाने तयार केलेला हा प्रस्तावित निवडणूक कार्यक्रम अंतिम मंजुरीसाठी नियोजन विभागाला पाठवण्यात आला असून त्यांची मंजुरी मिळताच निवडणुकी प्रक्रिया सुरू करण्यात येणार आहे.