म. टा. वृत्तसेवा , पाथर्डी
पालिका हद्दीत असलेल्या हंडाळवाडी शिवारात बसवण्यात येणाऱ्या एलईडी स्ट्रीटलाइटचे काम अंदाजपत्रकाप्रमाणे करावे या मागणीसाठी शिवसेनेने पालिका कार्यालयाला टाळे ठोकण्याचे आंदोलन केले. मुख्याधिकरी धनंजय कोळेकर यांनी दिलेल्या आश्वासनानंतर आंदोलन मागे घेण्यात आले. आता नेमलेली समिती दोन दिवसांत अहवाल देणार असून या अहवालाची प्रतीक्षा आहे.
या बाबत अधिक माहिती अशी की, पालिका हद्दीत असलेल्या हंडाळवाडी शिवारात पालिकेने एलईडी दिवे बसवण्याचे काम सुरू केले असून हे काम अंदाजपत्रकाप्रमाणे होत नसल्याचा आरोप करीत शिवसेनेचे शहरप्रमुख भाऊसाहेब धस यांनी बुधवारी पालिका कार्यलयाला टाळे ठोकण्याचा इशारा दिला होता. त्या नुसार धस यांच्या नेतृत्वाखाली तालुका उपप्रमुख भगवान दराडे, तालुका उपप्रमुख अप्पासाहेब सातपुते, सुनील परदेशी, रवीराज औटी, गणेश भागवत, अनिल भापकर, कैवल्य बोरुडे, हरी भापकर, केतन माने आदी शिवसैनिक पालिका कार्यलयात गेले व त्यांनी 'जय भवानी, जय शिवाजी' अशा घोषणा देत पालिका कार्यालय दणाणून सोडले. आंदोलनाची दखल घेऊन मुख्याधिकारी धनंजय कोळेकर यांनी या कामाचा आढावा घेण्यासाठी त्रिसदस्यीय समिती नेमून या समितीला दोन दिवसांत अहवाल सादर करण्याचे आदेश दिले. त्यानंतर शिवसैनिकांनी आंदोलन मागे घेतले.