म. टा. प्रतिनिधी, नगर
नगर रेल्वे स्टेशन परिसरात आता सीसीटीव्ही कॅमेऱ्यांची नजर राहणार आहे. रेल्वे स्टेशनमध्ये सुरक्षिततेचा विचार करून ४० सीसीटीव्ही कॅमेरे बसवण्यात आले आहेत. त्यामुळे आता येथील घडामोडींवर नजर ठेवणे शक्य होणार आहे.
नगर रेल्वे स्टेशन दीडशे वर्षे जुने आहे. येथे प्रवाशांची कायम वर्दळ असते. शिर्डी, शनी शिंगणापूर येथे जाण्यासाठी प्रवासी येथे येतात. त्यामुळे येथे कायम गर्दी असते. अशा परिस्थितीत या परिसराच्या सुरक्षिततेच्या दृष्टीकोनातून येथे सीसीटीव्ही कॅमेरे बसवण्याची मागणी रेल्वे सल्लागार समितीचे सदस्य हरजीतसिंह वधवा यांनी केली होती. जिल्हा प्रवासी संघटनेमार्फतही यासाठी पाठपुरावा केला जात होता. तसेच खासदार डॉ. सुजय विखे व माजी खासदार दिलीप गांधी यांच्याकडूनदेखील पाठपुरावा केला जात होता. या पाठपुराव्यास यश मिळाले आहे. रेल्वे स्टेशनवर ४० कॅमेरे बसवले आहेत. या परिसरात कॅमेरे बसवल्याबद्दल प्रवासी व नागरिकांच्या वतीने वधवा यांनी रेल्वेचे सोलापूर विभागाचे वाणिज्य अधिकारी प्रदीप हिरडे, शैलेंद्र गुप्ता, खासदार सुजय विखे, नगर रेल्वेचे वाणिज्य अधिकारी आर. एस. मीना, स्टेशन मास्तर एन. एस. तोमर तसेच 'आरपीएफ'चे कोतवाल यांचे आभार मानले. 'स्टेशनमध्ये सरकते जिने, तीन नंबरचे नवीन प्लॅटफॉर्म, नगर ते पुणे इंटरसिटी रेल्वे सुरू करण्यासाठी पाठपुरावा सुरू आहे,' असे वधवा यांनी सांगितले.