दुरुस्तीच्या कामामुळे दोन दिवस पाणी बंद

म. टा. प्रतिनिधी, नगर

वीज वितरण कंपनीच्या उच्चदाब विद्युत वाहिनीच्या दुरुस्ती देखभालीचे काम करण्यासाठी शनिवारी (२७ ऑगस्ट) सकाळी ९ ते सायंकाळी ५ या वेळेत वीजपुरवठा बंद ठेवण्यात येणार आहे. त्यामुळे महापालिकेच्या मुळा धरण येथील पाणी योजनेचा उपसा होऊ शकणार नसल्याने शनिवारी व रविवारी शहराच्या काही भागांत पाणी येणार नाही, अशी माहिती पाणीपुरवठा विभागातर्फे देण्यात आली आहे.

पाणी योजनेसाठी उच्च दाबवाहिनीतून वीज घेण्यात आलेली आहे. या वाहिनीवरील दुरुस्तीची कामे शनिवारी करण्यात येणार आहे. त्यामुळे मुळा धरण आणि विळद पम्पिंग स्टेशन येथून पाणीउपसा बंद राहणार आहे. त्याचा परिणाम पाणीपुरवठ्यावर होणार आहे. शनिवारी बोल्हेगाव, नागापूर, सावेडी उपनगरातील गुलमोहर रोड, पाइपलाइन रोड, लक्ष्मीनगर, सूर्यनगर, निर्मलनगर, मुकुंदनगर, स्टेशन रोड, सारसनगर, विनायकनगर, मुकुंदनगर, केडगाव, नगर-कल्याणरोड या भागात पाणीपुरवठा होणार नाही.

रविवारी रोटेशनुसार पाणीवाटपाच्या शहराच्या मध्यवर्ती भागात उशिरा आणि कमी दाबाने पाणीपुरवठा होणार आहे. नागरिकांनी याची नोंद घेऊन पाण्याचा वापर काटकसरीने करावा, असे आवाहन महापालिकेच्या पाणीपुरवठा विभागाने केले आहे.