कुऱ्हाडीचे घाव घालून पत्नी आणि मुलीची हत्या

अहमदनगर:
पत्नी आणि मुलीवर कुऱ्हाडीने वार करत त्यांची निघृण हत्या केल्याची धक्कादायक घटना कोपरगावमधील खडकी भागात मंगळवारी पहाटे घडली आहे. या कृत्यानंतर आरोपी पती स्वत:हून पोलीस ठाण्यात हजर झाला. दरम्यान कौटुंबिक वादातून या दोन्ही हत्या झाल्याची माहिती कोपरगाव पोलिसांनी दिली.

गणेश भीमराव खरात असे या आरोपीचे नाव असून तो कोपरगाव शहरात गवंडी काम करतो. आरोपीची सासू आपल्या मुलीला आणि नातीला माहेरी घेऊन जाण्यासाठी बुलडाण्याहून कोपरगावला आलेली असताना हा प्रकार घडला . माहेरी जाण्यापूर्वी पत्नी गौरीने गणेशकडे पैसे मागितले. गणेशने पैसे देण्यास नकार दिला. मुलीला पैसे न दिल्याने सासूचे गणेशशी कडाक्याचे भांडण सुरू झाले. आई आणि नवऱ्यामधील भांडण सोडवण्यासाठी गौरी पुढे आल्यावर संतापलेल्या गणेशने शेजारी पडलेली कुऱ्हाड तिच्या डोक्यात घातली. पत्नीला मारल्यावर त्यांच्या तीन वर्षाच्या चिमुरडीवरही कुऱ्हाडीने वार करत तिलाही संपवले. त्यानंतर सासूवरही त्याने हल्ला केला, परंतु या हल्ल्यात सासूचे प्राण वाचले मात्र गणेशच्या पत्नीचा आणि मुलीचा जागीच मृत्यू झाला.

या कृत्यानंतर आरोपी गणेश खरात हा स्वत:हून पोलीस ठाण्यात हजर झाला आहे. या हत्येप्रकरणी आरोपी गणेश भिमराव खरात याला पोलिसांनी तात्काळ अटक केली आहे.