नगर : जिल्ह्यातील ज्येष्ठ नेते आणि साहित्यिक यशवंतराव गडाख यांनी सोमवारी मुंबईत शिवसेना पक्षप्रमुख उद्धव ठाकरे यांची भेट घेतली. ही कौटुंबिक भेट असून, राजकीय चर्चा झाली नसल्याचे सांगण्यात आले. मात्र, त्यांच्यासोबत त्यांचे पुत्र आमदार शंकराव गडाख आणि प्रशांत गडाखही होते.
विधानसभा निवडणुकीनंतर नेवासा मतदारसंघातून क्रांतिकारी शेतकरी पक्षातर्फे विजयी झालेले आमदार शंकरराव गडाख यांनी शिवसेनेला पाठिंबा दिला आहे. त्यासाठी दिवाळीतच ते मुंबईला जाऊन आले. त्यानंतर आता ज्येष्ठ नेते गडाख यांनीही 'मातोश्री'वर जाऊन ठाकरे यांची भेट घेतली. ठाकरे यांनीच त्यांना भेटीचे निमंत्रण दिले होते. ठाकरे यांनी शिवसेनाप्रमुख बाळासाहेब ठाकरे यांचे 'फटकारे' हे पुस्तक गडाख यांना भेट दिले. या वेळी शिवसेना नेते सुभाष देसाई, शिवसेनेचे सचिव मिलिंद नार्वेकर उपस्थित होते. त्यानंतर गडाख कुटुंबीयांशी ठाकरे यांनी चर्चा केली. एका कार्यक्रमासाठी गडाख सुमारे २० वर्षांपूर्वी मातोश्रीवर गेले होते. त्याची आठवण या वेळी निघाली. नार्वेकर यांच्या माध्यमातून गडाख यांचा ठाकरे यांच्याशी मधल्या काळातही स्नेहाचे संबंध राहिल्याचे व त्यातून अनेकदा विविध कामांसाठी मदतही झाल्याचे सांगण्यात आले.
..............