मुंबईत सोमवारी बैठक; सत्यजित तांबेंचा पुढाकार
म. टा. प्रतिनिधी, नगर
लोकसभा निवडणुकीत राज्यात काँग्रेसला आलेल्या अपयशावर विचारमंथन करण्यासाठी युवक काँग्रेसने पुढाकार घेतला आहे. येत्या सोमवारी (३ जून) दुपारी १ वाजता दादरच्या टिळक भवनात या विषयावर खुली चर्चा आयोजित करण्यात आली आहे. युवक काँग्रेसचे प्रदेशाध्यक्ष सत्यजित तांबे यांच्या पुढाकाराने होणाऱ्या या बैठकीस युवक व विद्यार्थी काँग्रेसचेच तरुण पदाधिकारी बोलावण्यात आले असून, त्यांनी 'मनातील भावना मोकळ्या मनाने' या खुल्या चर्चेत मांडण्याचे आवाहनही करण्यात आले आहे.
लोकसभा निवडणुकीत काँग्रेसला राज्यात अवघी एक जागा चंद्रपूरची जिंकता आली आहे. तर मित्रपक्ष राष्ट्रवादीने ५ जागा जिंकल्या आहेत. काँग्रेसची अनपेक्षित वाताहत झाल्याने महाराष्ट्रातील पक्ष पराभवाची कारणे शोधण्यासाठी युवक काँग्रेसने 'खुली चर्चा' आयोजित केली आहे. युवक व विद्यार्थी काँग्रेसच्या आजी-माजी पदाधिकाऱ्यांसह प्रमुख कार्यकर्त्यांना यात सहभागी होण्यासाठी बोलावण्यात आले आहे. लोकसभा निवडणुकीत महाराष्ट्रात काँग्रेस नेमका कुठे कमी पडला, यावर खुली चर्चा व्हावी यासाठी ही बैठक बोलावल्याचे महाराष्ट्र प्रदेश युवक काँग्रेसचे प्रदेशाध्यक्ष सत्यजीत तांबे यांनी 'मटा'ला सांगितले.
लोकसभेचा निकाल हा काँग्रेससाठी धक्कादायक आहे. परंतु, हा जनादेश काँग्रेसजनांनी नम्रपणे स्वीकारला पाहिजे. या पार्श्वभूमीवर राज्यात आपण कुठे कमी पडलो याची खुली चर्चा व परीक्षण मोकळ्या वातावरणात व्हावे आणि या चर्चेद्वारे स्पष्ट झालेल्या चुकांपासून धडा घेऊन येणाऱ्या विधानसभा निवडणुकीची रणनीती आखावी तसेच युवक काँग्रेस व वरिष्ठ काँग्रेसद्वारे कुठले कार्यक्रम राबवले जावेत, याचे नियोजन करण्याच्या उद्देशाने या चर्चेचे आयोजन केल्याचे तांबेंनी स्पष्ट केले. याच बैठकीत विधानसभा निवडणुकीसाठी युवक काँग्रेसच्या कामाची रणनीती ठरवण्यात येणार असल्याचेही त्यांनी सांगितले.
--
पक्षात अस्वस्थता
लोकसभा निवडणुकीत काँग्रेसला मोठा पराभव पत्करावा लागल्यानंतर पक्षांतर्गत घडामोडींना वेग आला आहे. काँग्रेस पक्षाध्यक्ष राहुल गांधींनी आपल्या पदाचा राजीनामा देण्याची तयारी दाखवली असून काँग्रेसच्या इतर नेत्यांकडून त्यांच्या मनधरणीचे प्रयत्न सुरू आहेत. पक्षाध्यक्ष गांधींच्या निर्णयावर देशभरातील विविध राज्यांतील पक्षाध्यक्ष व अन्य पदाधिकाऱ्यांचे अस्तित्व ठरणार आहे. या घडामोडींमुळे पक्षात अस्वस्थता आहे.
--