म. टा. प्रतिनिधी, नगर येथील सीएसआरडी महाविद्यालयामध्ये ग्रामीण युवकांसाठी ११ व १२ डिसेंबरला राज्यस्तरीय युवा महोत्सवाचे आयोजन करण्यात आले आहे. यानिमित्त विविध स्पर्धांचे आयोजन करण्यात आले असून अहमदनगर कॉलेजचे प्राचार्य डॉ. आर. जे. बार्नाबस यांच्या हस्ते ११ डिसेंबरला सकाळी अकरा वाजता या महोत्सवाचे उद्घाटन होणार आहे. भा. पा. हिवाळे संस्थेला यंदा ५० वर्षे पूर्ण होत आहेत. या संस्थेच्या अंतर्गत अहमनगर कॉलेज, सीएसआरडी कॉलेज व आयएमएस कॉलेज ही तीन महाविद्यालये येतात. संस्थेला यंदा ५० वर्षे पूर्ण होत असल्यामुळे विविध उपक्रमांचे आयोजन या कॉलेजांमध्ये करण्यात येत आहे. या उपक्रमांचा एक भाग म्हणून ११ व १२ डिसेंबरला ग्रामीण युवकांसाठी राज्यस्तरीय युवा महोत्सव घेण्यात येणार आहे. ग्रामीण युवकांना उच्च शिक्षण देऊन सक्षम करणे, हा संस्थेचा उद्देश असल्यामुळे या युवा महोत्सवाचा विषय 'ग्रामीण विकासासाठी उच्च शिक्षण' असा ठेवण्यात आला आहे. युवकांच्या कलागुणांना वाव देता यावा, हा या महोत्सवाचा मुख्य उद्देश असल्याचे 'सीएसआरडी'चे संचालक डॉ. सुरेश पठारे यांनी सांगितले. युवा महोत्सवामध्ये सांघिक व वैयक्तिक स्पर्धांचे आयोजन करण्यात आले आहे. यामध्ये प्रामुख्याने 'युवकांसमोरील उच्च शिक्षणातील आव्हाने', 'व्यवसायाभिमुख व गुणवत्तापूर्ण शिक्षण : काळाची गरज', 'शिक्षण : सामाजिक विकासाचे साधन', या विषयावर पथनाट्य, मूकनाट्य व सामाजिक समूह गायनस्पर्धा सांघिक स्वरूपाची असणार आहे. तर, पोस्टर (भित्तीपत्रक) बनवणे, वक्तृत्वस्पर्धा या वैयक्तिक स्वरूपाच्या असतील. तरी इच्छुक स्पर्धकांनी www.csrd.edu.in या संकेतस्थळावर नोंदणी करावी.
'सीएसआरडी'मध्ये युवा महोत्सव
म टा प्रतिनिधी, नगर येथील सीएसआरडी महाविद्यालयामध्ये ग्रामीण युवकांसाठी ११ व १२ डिसेंबरला राज्यस्तरीय युवा महोत्सवाचे आयोजन करण्यात आले आहे...
महाराष्ट्र टाइम्स.कॉम 5 Dec 2019, 4:00 am