आंदोलनामुळे ‘झेडपी’चे काम ठप्प

म. टा. प्रतिनिधी, नगर

जिल्हा परिषदेच्या लेखा विभागातील कर्मचाऱ्यांनी बुधवारी लेखणी बंद आंदोलन केल्याने जिल्हा परिषदेचे आर्थिक कामकाज ठप्प झाले. रिक्त पदे भरती, पदोन्नती नियम व अन्य मिळून १० मागण्यांसाठी हे आंदोलन केले गेले. नगरला कर्मचारी संघटनेचे अध्यक्ष ए. वाय. नरोटे यांच्या नेतृत्वाखाली कर्मचाऱ्यांनी हातात लेखणी धरून जिल्हा परिषदेसमोर जोरदार घोषणाबाजी केली.

लेखाधिकारी वर्ग-२च्या पदोन्नतीचा कोटा ठरवला जावा, जिल्हा परिषदेतील सहायक लेखाधिकाऱ्यांना राजपत्रित दर्जा दिला जावा, वरिष्ठ सहायक (लेखा) व सहायक लेखाधिकारी यांना ग्रेड पे मंजूर व्हावा, रोहयो व इंदिरा आवास योजनेंतर्गत पंचायत समिती स्तरावर सहायक लेखाधिकारी पद निर्माण केले जावे, लेखा सेवा वर्ग-३ची स्पर्धा परीक्षा घेतली जावी, या विभागातील कर्मचाऱ्यांना पदोन्नती देण्यापूर्वी त्यांना प्रशिक्षण दिले जावे, कर्मचाऱ्यांचे जॉब चार्ट केले जावेत, आदी मागण्यांसाठी महाराष्ट्र राज्य जिल्हा परिषद लेखा कर्मचारी संघटनेने १० ते १४ मार्चदरम्यान काळ्या फिती लावून काम केले व बुधवारपासून लेखणी बंद आंदोलन सुरू केले. अध्यक्ष नरोटे यांच्यासह सह कार्याध्यक्ष दीपकसिंग परदेशी, कार्याध्यक्ष विजयकुमार कोरडे, सचिव चंद्रशेखर वांढेकर व अन्य सदस्यांनी नियोजन केले. जिल्हाभरातील १५० कर्मचारी यात सहभागी झाले होते. यामुळे धनादेश निघणे, अनुदान वितरित करण्यासह अन्य व्यवहार ठप्प झाले होते.