राष्ट्रवादीसाठी इच्छुकांचे शक्तिप्रदर्शन

म. टा. प्रतिनिधी, नगर

राष्ट्रवादी काँग्रेसने आयोजित केलेल्या इच्छुकांच्या मुलाखतींच्या प्रक्रियेत गुरुवारी उत्तर नगर जिल्ह्यातील सात तालुक्यांतील इच्छुक उमेदवारांनी जोरदार शक्तिप्रदर्शन केले. शुक्रवारी (१३ जानेवारी) दक्षिण नगर जिल्ह्यातील इच्छुकांच्या मुलाखती घेतल्या जाणार आहेत.

जिल्हा परिषदेवर मागील पाच वर्षांत राष्ट्रवादीची सत्ता आहे. ही सत्ता पुढेही कायम राखण्याचे आव्हान पक्षासमोर आहे. राज्यात व केंद्रात जरी सत्ता नसली तरी स्थानिक स्वराज्य संस्थांतील सत्ता राखण्याचे जोरकस प्रयत्न राष्ट्रवादीकडून सुरू आहेत. या प्रयत्नांचा भाग म्हणून नगरला दोन दिवस इच्छुक उमेदवारांच्या मुलाखतींची प्रक्रिया राबविली गेली. जिल्ह्याचे प्रभारी दिलीप वळसे, ज्येष्ठ नेते मधुकर पिचड, जिल्हाध्यक्ष चंद्रशेखर घुले, जिल्हा परिषद अध्यक्ष मंजूषा गुंड, जिल्हा बँकेचे अध्यक्ष सीताराम गायकर, आ. संग्राम जगताप, तसेच माजी आमदार दादा कळमकर, आशुतोष काळे, प्रा. माणिक विधाते, सिद्धार्थ मुरकुटे, अविनाश आदिक या मान्यवरांनी इच्छुकांचे मनोगत जाणून घेतले.

गट व गणांची माहिती

मुलाखतींच्या पहिल्या दिवशी नेवाशासह अकोले, कोपरगाव, संगमनेर, श्रीरामपूर, राहाता व राहुरी या सात तालुक्यांतील जिल्हा परिषद गट व पंचायत समिती गणांतून उमेदवारी करू इच्छिणाऱ्यांशी नेत्यांनी संवाद साधला. संबंधित गट व गणांतील मतदारसंख्या, निवडणूक लढविण्याची भूमिका, सामाजिक काम, पक्षात भूषवलेली विविध पदे, गट व गण आरक्षित असेल तर जात प्रमाणपत्र व अन्य कागदपत्रांची तयारी आदी सविस्तर माहिती घेतली. उमेदवारांना पक्षाकडून असलेल्या अपेक्षाही जाणून घेतल्या. गट वा गणात प्रतिस्पर्धी कोणत्या पक्षाचा असेल, त्या पक्षाची तेथील स्थिती व अन्य विविध माहितीही समजून घेतली. राहाता व संगमनेर वगळता अन्य तालुक्यांतून मुलाखतींसाठी इच्छुकांची संख्या जास्त होती. यानिमित्ताने प्रत्येक उमेदवाराने समर्थकांसमवेत हजेरी लावून शक्तिप्रदर्शनही केले.

एकत्र येण्याची अपेक्षा

जिल्हा परिषद व पंचायत समिती निवडणुकीत समविचारी पक्षांनी एकत्र येण्याची अपेक्षा पक्षाचे प्रभारी दिलीप वळसे यांनी पत्रकारांशी बोलताना व्यक्त केली. मात्र, काँग्रेससमवेत आघाडीचा प्रस्ताव अद्याप त्यांच्याकडून आलेला नाही, अशी आघाडी करावयाची की नाही, याचा निर्णय राष्ट्रवादीच्या वरिष्ठ पातळीवर होणार असल्याचेही त्यांनी स्पष्ट केले. ‘सध्या तरी आम्ही जिल्हा परिषद व पंचायत समित्यांच्या सर्वच जागा लढविण्याची तयारी सुरू केली आहे. स्थानिक स्तरावर होणाऱ्या आघाड्यांबाबतही वरिष्ठांशी विचारविनिमय झाल्यानंतरच अंतिम निर्णय होणार आहे’, असेही त्यांनी सांगितले. राष्ट्रवादीने या निवडणुकीच्या दृष्टीने पूर्ण तयारी केली आहे.