म. टा. वृत्तसेवा, शेवगाव जिल्हा परिषद शेवगाव गटाच्या पोटनिवडणुकीत रविवारी विक्रमी ७४.२२ टक्के मतदान झाले. सध्या पडलेले कडाक्याचे ऊन आणि पोटनिवडणूक असल्याने मतदान कमी होईल, असे मानले जात होते; मात्र, मतदानाची टक्केवारी वाढल्याने निवडणुकीतील चुरस वाढली आहे. आज (१८ एप्रिल) मतमोजणी होणार असून वाढलेल्या मतदानाचा फायदा नेमका कोणाला होणार हे स्पष्ट होणार आहे. या निवडणुकीत एकूण तीन उमेदवार उभे असले तरीही खरी लढत ही भारतीय जनता पक्षाचे नितीन काकडे, राष्ट्रवादी काँग्रेसचे शिवाजी नेमाणे यांच्यातच होणार आहे. भारतीय कम्युनिस्ट पक्षाने या ठिकाणी भाऊसाहेब भुसे यांना उमेदवारी दिली होती. सात गावांधील १० मतदान केंद्रावर मतदान घेण्यात आले. दुपारपर्यंत काही मतदान केंद्रावर रांगा लागल्याचे तर काही ठिकाणी शुकशुकाट असल्याचे चित्र पहावयास मिळाले. सर्वाधिक मतदान वरखेड येथे ८५.३६ टक्के तर सर्वाधिक कमी मतदान ठाकूर निमगाव येथे ५५.९५ टक्के झाले. या निवडणुकीत ३२२५ पुरुषांनी तर २८५० महिलांनी मतदानाच हक्क बजावला. निवडणूक निर्णय अधिकारी अशोक साळी यांच्या अधिपत्याखाली आज मतमोजणी होणार असून राष्ट्रवादी काँग्रेस व भाजपने प्रतिष्ठेच्या केलेल्या या लढाईत कोण बाजी मारणार हे आज स्पष्ट होणार आहे. |
झेडपी शेवगाव गटासाठी विक्रमी ७४ टक्के मतदान
जिल्हा परिषद शेवगाव गटाच्या पोटनिवडणुकीत रविवारी विक्रमी ७४.२२ टक्के मतदान झाले. सध्या पडलेले कडाक्याचे ऊन आणि पोटनिवडणूक असल्याने मतदान कमी होईल, असे मानले जात होते; मात्र, मतदानाची टक्केवारी वाढल्याने निवडणुकीतील चुरस वाढली आहे.
Maharashtra Times 18 Apr 2016, 3:00 am