दिव्यांगांसाठी करणार पाणी, खुर्च्यांची व्यवस्था

म. टा. प्रतिनिधी नगर

जिल्हा परिषदेत दिव्यांगांसाठी कोणत्याही सुविधा नाहीत. ओळखपत्र घेण्यासाठी येथे येणाऱ्या नागरिकांना तासनतास ताटकळत रहावे लागते. येथे पिण्यासाठी पाणी नाही, बसण्यासाठी खुर्च्याही ठेवलेल्या नाहीत. या साध्या मागण्यांसाठीही सातत्याने पाठपुरावा केल्यानंतर अखेर जिल्हा परिषदेस शहाणपणा सूचला आहे. दिव्यांगांची हेळसांड होत असल्याचे पाहून अपंग कल्याण कार्यालयात येणाऱ्या दिव्यांगांना येथे पिण्याच्या शुद्ध पाण्याची व बसण्यासाठी खुर्च्यांची व्यवस्था होणार आहे. या सुविधा उपलब्ध करून देण्यासाठी समाजकल्याण विभागाने बांधकाम विभागास पत्र दिले आहे.

जिल्हा परिषदेच्या जुन्या इमारतीच्या तळ मजल्यावर अपंग कल्याण कार्यालय आहे. येथे कामानिमित्त रोज हजारो दिव्यांग नागरिक जिल्ह्यातून येतात. एसटी प्रवासाच्या ओळखपत्रासाठी येणाऱ्यांची संख्या जास्त आहे. गर्दी जास्त असल्याने काम होण्यासाठी बराच वेळ थांबावे लागते. काही वेळा तर तासनतास रांगेत उभे रहावे लागते. येथे मात्र कोणत्याही सुविधा नाहीत. बसण्यासाठी खुर्च्याही येथे नाहीत. तहान लागल्यानंतर पाण्याची व्यवस्था करण्याचे दातृत्वही जिल्हा परिषदेने दाखवलेले नाही. उन्हाळ्याच्या दिवसात तर येथे येणाऱ्या दिव्यांगांचे हाल होतात. या साध्या गरजांकडेही जिल्हा परिषदेच्या अधिकाऱ्यांनी दुर्लक्ष केले. त्यामुळे या साध्याच परंतु दिव्यांगांच्या दृष्टीने महत्त्वाच्या असणाऱ्या गरजा पूर्ण करण्यासाठी प्रहार अपंग क्रांती संघटनेने सातत्याने पाठपुरावा सुरू ठेवला होता. सातत्याने होणाऱ्या या पाठपुराव्यानंतर अखेर जिल्हा परिषदेस जाग आली आहे. दिव्यांग नागरिकांसाठी तातडीने या सुविधा उपलब्ध करून देण्यासाठी बांधकाम विभागाच्या कार्यकारी अभियंत्यांना समाजकल्याण विभागाने पत्र पाठवल्याचे संघटनेचे शहराध्यक्ष बाबासाहेब महापूरे यांनी सांगितले.